NH. 06 leh 306 siamthat turah Dan dik lova pass pek tumna a awm loh thu Revenue Minister in a sawi

Land Revenue & Settlement Department changtu Minister Lalruatkima chuan National Highway 06 leh National Highway 306 siamthatna tura hmalakna ah dan dik lova pass pek tumna a awm loh thu sawiin, dan ang thlapin ram neitu dik tak te leh kut hnathawktute tan erawh Valid Pass siamsak chu sawrkarin a tum mai zawk niin a sawi.

Nimin-a a Pisa-a thuthar thehdarhtute a kawmna ah Revenue Minister Lalruatkima chuan NH 06 leh NH 306 siamthat tumna ah Mizoram sawrkarin hma a lak mek lai leh mipuite hma ngai tak chunga ke a pen mek laia thu chiang hre lova Press leh Media kaltlanga beih an tawk chu pawi a tih thu sawiin, Sawrkarin Periodic Patta lem siam tumna Official-a an hriat loh thu a sawi a, “Periodic Patta lem kha siam ni ila, chuta mawhphurtu zawng zawng chu Revenue Department-a kan Officer te an ni tel dawn a. An service anni tan hlan ngam chi a ni lo a. Dan hnuaiah hma lak theih a nih angin hma kan la a, dan bawhchhiatna a awm lo a ni,” a ti.

ZPM Leader Lalduhoma'n dan lova Pass pek tum mi 71 lai awm anga a sawi chu tun thlengin Official angin an la hriat loh thu sawiin, “Amaherawh chu, hetah hian dan lo anga Periodic Patta siam a awm a nih chuan chu'ng mite dilna chu uluk takin kan en dawn a ni,” a ti a. Ram dilna Settlement Office-a thehluh te hi dan angin a dik em tih enfiah a nih hnuah, Directorate lamah Technical Checking tih leh a ni a, chumi hnuah Secretariat-ah thawn niin uluk taka endik leh a nih hnuah chauh ram hi pek thin a nih thu diklo a awm chuan cancel thlenga hma an lak tur thu a sawi bawk.

Kolasib District chhunga NH 06/306 kawng chei that turah Ministry of Road, Transport and Highways (MoRTH) thuchhuah zulzuiin kawng siam that in a tihchhiat tur ramah, Revenue Pass ni lo, VC pass nei an tam tih sawiin, he'ng pass neitute list hi Bhoomirashi portal-ah MoRTH in Section 3(A) of NH Act anga dah a nih thu sawiin Lalruatkima chuan, “Sawrkar in National Highway siamna tura ram tihchhiat tur neitute kut benga an awm a duh loh avang leh, an ram lo enkawl mek te an thlahtute atanga eizawnna atana an lo hman tawh leh hman mek hian hlutna (land value) nei ve se tiin dan hnuaiah tho kawng a zawnpui zawk a ni,” tiin, hei hi mipuite hma ngai taka sawrkar hmalakna a nih thu leh dan bawhchhiatna a awm loh thu a sawi bawk.