Latest News

Serchhip khawpui helna kawng laih tan a ni

National Highway-54 laihzauh leh siamthat hna thawh mekah Serchhip khawpui chhung helna tur, Kikawn atanga Sailiamkawn-a chhuak tur laih hna chu thawh tan a ni ta.

NH-54 kawngpui laihzauh leh siamthat hna Japan International Corporation Agency (JICA) hnuaia thawh mekah hian Serchhip khawpui chhung chu NH. 54 hian a paltlang tawh dawn loh avangin a helna (by-pass) kawng laih hna chu tunkar Thawhtanni atang khan thawh tan a ni a, he kawngpui laih hna thawktu Prem KRAM Company hotute chuan hna an zawhfel hma chu thawh anih dawn thu sawiin, kum hnih chhunga zawh hman tur a nih thu an sawi bawk. Serchhip khawpui helna tur kawngpui hi New Serchhip North VC huamchhung, Kikawn atanga intanin Serchhip Darnam VC huamchhung, Sailiamkawn-a chhuak tur niin Serchhip khawpui chhung chu chhuah lamah a hel tawh dawn a, kawngpui thar thui zawng hi KM 11.8 tur niin he kawng ah hian Lei pahnih dawh a ni dawn bawk a, Lei pakhat zawk sei zawng hi meter 140 niin pakhat zawk sei zawng hi meter 20 vel a ni dawn bawk a ni.

Tarlan tawh angin NH. 54 laihzuah leh siamthat hna thawh mekah hian Serchhip khawpui chhung kawng siamthat hna pawh thawh mek a ni a, Serchhip khawpui hmarlam, Chhiahtlang atanga tanin KM 2-a thui siam a nih hnuah chhimlam atanga tan leh tura ruahman a nih thu he hna thawktute chuan an lo sawi tawh a, tunah hian Chhiahtlang lam kawng hi thawh zawh tep tawh niin, karleh lam atang hian Serchhip Sailiam kawn atanga hmarlam panin kawngpui siamthat hna hi an chhunzawm theih an inbeisei tih thawktute chuan an sawi a ni.

Comments

Chhiar Hlawhte