COVID-19 hri danna pek dan tur sawihona nei

Serchhip District Level Task Force on COVID-19 Vaccination chu nimin khan an Chairman, Serchhip District Bawrhsap, Kumar Abhishek kaihhruaia thukhawmin COVID-19 Vaccine a taka pekchhuah theih a nih huna vaccine pek hmasak tur ruahmanna te, District puma vaccine sem a nih huna mamawh turte an sawiho.

He thutkhawm Serchhip DC Meeting Hall-a neih ah hian Bawrh-sap chuan Mizoram-ah COVID-19 vaccine la hmu chiahlo mah ila kan hmuh theih huna District chhunga a dawng hmasa turte sawrkar laipui leh State duh danin kan lo in ruahman fel thu leh Serchhip District pawh a dawng hmasa tur list thehlut hmasa ber te zinga mi kan ni tih a sawi a. Vaccine phurh kualna turte, a dahna turte, thawk-tute a tul anga training lo pekte leh mamawh dang awm thei apiang ngaihtuah lawk a pawimawh thu sawiin, thuneitu sang zawk atanga a kalpui dan tur thuchhuak zulzui zela vaccine pek dan tur hmala turin he Task Force hi din a ni, a ti.

He thutkhawm ah hian Member Secretary leh District Immunization Officer (DIO), Dr. Lalhlunpuii chuan Serchhip District-ah Vaccine dah lailawk theihna (facilities) Hospital leh PHC 10 an awm mek thu leh heng zinga pakhat, Mercy Private Hospital tih loh chuan a phurh sawnna tur Bawm (box) an neih vek thu a sawi a, Vaccine pekchhuah theihna Centre 35 a awm thu leh District Hospital-ah a chhekkhawla (District Vaccine Store) a awm thu tarlang bawk.

Nimin a thutkhawm hi Task Force thut-khawm tumkhatna a ni a, State Level Authority in tih tur an ruahman hrang hrang te en hovin hmalak zui ngaite an sawiho bawk.