Latest News

WATSAN Committe training

PHE Serchhip WATSAN Division hnuaia WATSAN Committee te tana Training chu nimin khan Serchhip P&E Veng YMA Hall-ah neih leha zawhfel a ni a, he training-ah hian Serchhip Sub-Division huamchhunga WATSAN Committee Member te an tel a ni. Hemi hmalam hian East Lungdar Sub-Division huamchhung ami te tan East Lungdar-ah leh Tlungvel Sub-Division huamchhung ami te tan Tlungvel-ah te neih a ni tawh a ni.

Serchhip District-a Rubber chingtu mi 7 te hnenah Rubber Rolling Machine leh a sawngbawlna pe

Serchhip District chhunga Rubber chingtu chhungkaw 7 te hnenah Land Resources, Soil & Water Conservation Department chuan nimin khan Rubber sawngbawlna leh a herna khawl an pe a, heng khawl te hi Assembly Deputy Speaker, Er. Lalrinawma chuan Serchhip atangin a vailiam a ni.

Heng Rubber herna khawl leh a sawngbawlna bungrua vailiamna puala Inkhawm tawi Serchhip District Land Resources, Soil  & Water Conservation Office tual-a neih ah Er. Lalrinawma chuan Serchhip District a chhungkaw 58 zetin Rubber huan neia hma an la mek te, an zinga chhungkaw 20 te phei chu hnai thei tawh khawpa an lo thawkrim te, Mizoram-ah Rubber hnai theih tawh kung nuai hnih vel zet kan nei mek te chu chanchin lawmawm tak nia a hriat thu a sawi a. Serchhip District-ah hetiang khawl dawng thei khawpa hna an lo thawkrim chu sawrkar tan pawh a lawmawm a ni, a ti. Mizoram chu tlangram a nih avangin bungrua chet kual tir vel a hautak tih sawiin, Link Road pawh hmun tinah kan mamawhna a sang hlawm em em tih a sawi a. Hei vang hian kuthnathawktute pawh hian thlai thar rit sak, thiar vel hautak chi, kan hlawkna ei heu nasa thei chi te kalsan a, a zangkhai chi kan dap nasat a tul nia a hriat thu sawiin, rubber pawh chutiang atana tha tak nia a ngaih thu a sawi bawk.

Hemi puala inkhawm tawi neih hi Serchhip DO, P. Lalbiakkima chuan a kaihruai a, he huna tarlan a nih danin Serchhip District-ah hian Rubber huan enkawllai chhungkaw 58 an awm mek a, heng zinga chhungkaw 20 te chu Rubber hnai mai theih nei tawh niin heng mite hman tur hian Rubber Rolling Machine leh bungraw dang te hi pek an ni.

Tun tuma bungrua dawngtute hi Ser-chhip khua atangin H. Lianhrima, Samuela, C. Lalnunkima leh Jerome Rokima te niin Keitum atangin Zoramthanga leh Lalawmpuii bakah Tlungvel atangin K. Lalhluna te an ni a, mi pakhat hian bungrua Rs. 88,355/- hu dawngin a dawngtute hian Rs. 10,000/- in an dolet ve bawk a. Heng an khawl dawn hmang hian Rubber chingtute hian an bungrua pakhatmah hman belh lovin Rubber te hnaiin an sawngbawl thei tawh dawn a ni.

Comments

Chhiar Hlawhte