Latest News

Mizoram-ah hri kai 4000 tling

Niminpiah-a Mizoram-a Sample enfiah te atangin COVID-19 hri kai mi 14 hmuh belh leh an ni a, Mizoram-a hri kai hmuhchhuah chu sang li an tling ta.

Niminpiah khan ZMC Laboratory-ah Sample 391 enfiah niin COVID-19 hri kai mi 5 hmuh an ni a, District hrang hrang TrueNat Laboratory-a Sample enfiah 220 atangin hri kai mi 3 hmuh niin Rapid Antigen Test hmanga Sample 599 enfiah atangin hri kai mi 6 hmuh an ni bawk a ni. ZMC Laboratory-a hri kai an hmuh te hi SLT Infracon Pvt. Ltd hnuaia thawk tura State pawn atanga Aizawl District-a rawn lut vek an ni a, TrueNat Laboratory atanga hri kai hmuhchhuah te hi Lunglei District-a hri kai hmuhchhuah te niin BSF Sipai, State pawnlam atanga rawn lut te an ni bawk.

Niminpiah a Rapid Antigen Test hmanga hri kai hmuhchhuah mi 6 te hi tualchhung-a hri inkaichhawng vek niin an lang thung a, Aizawl District-ah hri kai 5 hmuhchhuah niin Sihphir Venghlun-a hri kai mi pahnih te chu tualchhung a hri inkaichhawng niin midang pathum, Melthum mi pahnih leh Laipuitlang mi pakhat te chu an damloh avanga damdawi In-a inentir tura kal, hri an kai tih hmuhchhuah niin hri an kaina hriat a ni lo. Lawngtlai District Mampui khaw mi pakhat chu hri a kai tih hmuhchhuah ni bawkin Free Clinic-a inentir tura kal, hri a kaina hriatloh a ni bawk.

Mizoram-a COVID-19 hri kai zing ami, MK. Roy (83) chu nimin chawhnu dar 1:00 khan State Referral Hospital, Falkawn ZMC-ah a boral ve leh a, MK. Roy hi Zunthlum nei niin tun thla ni 9 khan ZMC-ah hian dahluh a ni.

Nimin khan Mizoram-a hri kai mi 20 te chu enkawl dam leh an ni thung a, heti hian Mizoram-a hri kai hmuhchhuah chu 4008 nin an zinga 3820 te chu enkawl dam an ni tawh a, tunah hian hri kai enkawllai 181 la awmin a, hri kai zingah nunna chan mi 7 an awm ta a ni.

Comments

Chhiar Hlawhte