Chanchin thar thenkhat :

Kanhmun-ah venhimna uluk

Tunhnaiah Mizoram ramri dep Tripura-ah COVID-19 vei hmuhchhuah belh a nih tak avangin ramri ven hna uluk lehzuala kalpui zel a ni a, nimin khan Mamit CMO, Dr. Vanlalfela chuan Kanhmun khua hi tlawhin Tripura nena inrina Langkaih Lei Gate leh Medili Lei leh a bul vel chu damdawi (Sodium Hypocloride) hmanga kah thianghlim a ni a. COVID-19 vei palh thulha Medical Team-te him leh uluk taka chetlak dan turte sawiho nghal a ni bawk. Kan-hmun khawchhung atangin ramri-a duty tur ruihhlo leh a kaihhnawiha fihlim leh mi rintlak mi 120 thlanchhuah niin uluk taka ramri venhimna hi kalpui a ni ang. Ramri depa awm Kanhmun khua chuan Mizoram-in he natna kan kai lohna tur hian ramri venhimna kawngah theihtawp an chhuah zel tih sawiin, chhun zan zawmin ngawrh taka duty kalpui zel a ni ang.
SWD Minister in Home tlawh
Siaha-a cham mek Social Welfare Minister, Dr. K. Beichhua chuan nimin khan Easter Sunday denchhenin Siaha khawchhunga Hnuchham In (Children's Home) te tlawhin thilpek a hlan a. SWD Minister hian Ebenezer Children's Home, Grace Children's Home leh Salvation Army's Orphanage Boys Home te tlawhin Chief Mi-nister's Relief Fund atangin tanpuina pawisafai a hlan nghal bawk. Heng Home hrang hrang a tlawh enkawltute chuan Minister hnenah hian ei leh bar ah an dinhmun a that thu lo hrilhin, Minister hian Home enkawltute chu thlamuang taka awm tur leh a enkawl Department chuan engtiklai pawhin an dinhmun a enpui reng thu a hrilh bawk a ni.
Hna zawh hun tur hriatloh
Lawngtlai atanga Myanmar ram pawh tura kawngpui sial mek, Kaladan Multi Modal Transit Transport Project hnuaia hnathawh kallai chu COVID-19 avanga hnathawh chhunzawm theih a nih loh avangin zawh hun tura ruahman ah an zo hman dawn em tih hriat theih a nih loh thu he hna enkawltute chuan an sawi.
CS in khapna tichhuak thar
Mizoram Chief Secretary chuan Inrinni khan thuchhuah siamin COVID-19 laka mipui an lo him theih nan vantlang hmunah Chil chhak lo turin mipui a hriattir a. He thupek bawhchhia te chu The Mizoram Epidemic Diseases (COVID-19) Regulations, 2020 Section 13 in a sawi angin an chungah hremna lekkawh theih a ni ang.
Hnamdang mi 21 te man
Bilkhawthlir South Local Task Force te chuan nimin khan Phaipheng ram-ah hnamdang mi 21 manin sawrkar thuneitute kutah an hlan. Heng hnamdang mi 21 zet te hi a tirah Mizoram a rawn lut ru nia rinna lian tak a awm a, hei vang hian Kolasib District Bawrhsap hmalakna in SP leh a hoten heng mite chanchin hi an chhui zui nghal a, Mizoram-a rawn lut ru ni lovin an khaw lama haw tum an ni tih thuneitute chuan an sawi. Thuneitute sawi danin heng mite hian nizan hmasa khan Aizawl atangin Truck-ah an khaw lam panin an zinga mi 20 hi Karimganj lam mi niin pakhat hi North Tripura lam mi a ni thung a, Truck driver hian ramri-ah phur tlang ngam lovin Kolasib Rengtekawn thlang-a Zero Point bulah a chhuk tir a, hei hi ke-a kal zelin Local Task Force duty te hian an lo man ta a ni.
Health Minister in lawmawm ti
Health Minister, Dr. R. Lalthangliana chuan Mizoram-ah COVID-19 kai thar tun thlenga kan la neih belh lo chu lawmawm a tih thu nimin-a Easter Sunday puala Mizoram Media te hnenah thuchah a tihchhuah ah tarlangin, mipuite hnena thu dik leh rintlak thehdarhtu I&PR Department leh All India Radio, Aizawl bakah Cable TV leh Print Media ten mipuite hnena zirtirna tha tak tak an thehdarh thin vang a nih thu a tarlang a. Thihna hial pawh hneha tho leh Isua Krista nun tawmpuitu kan nih avangin tuna kan ram-in kan buaipui em em COVID-19 pawh hi kan hneh ngei ang tih ring tlata zam lovin theihtawp chhuah zel tura chahin, “Easter Sunday hian hnehna puang thar a, Pathian rinchhanin chak tak leh huai taka kal zel turin i inbuatsaih thar theuh ang u,” a ti a, Media te chu an mawhphurhna hlen zel turin duhsakna a hlan bawk.
CM hovin sawihona nei dawn
Vawiin hian Chief Minister, Zoramthanga hovin Aizawl-ah Mizoram-a Lockdown kalpui zel dan tur sawihona neih a ni dawn.

Comments

Chhiar Hlawhte