Mizoram-a nitin mamawh phurhluh dan tur chungchanga inrawnkhawmna neih a ni

Mizoram State pawn atanga Mizoram chhunga nitin mamawh phurhluh dan tur chungchanga inrawnkhawmna chu Inrinni khan Transport Minister, TJ. Lalnuntluanga hovin neih a ni a, he inrawnkhawmna-a an thusawi atang hian Transport Department chuan bungraw phurhluh chungchanga zawm tur inkaihhruaina, Standard Operation Procedure (SOP) a duang dawn a ni.

Transport Minister Pisa-a he inrawnkhawmna ah hian Transport Minister, TJ. Lalnuntluanga chuan khawvelin hun khirh tak a tawn lai a nih vangin Mizoram pawh kan bang bik chuang lo tih sawiin, inthlahdah lova theihtawp chhuaha kan fimkhur zual a ngai a ni, a ti a. Mizoram mamawh eitur leh bungrua chi hrang hrang kan lakluh reng ala ngaih si avangin heng te hi engtin nge him taka kan kalpui ang tih kan ngaihtuah a ngai tih sawiin, Mizoram mamawh rawn phurluttu lirthei khalhtu, a bik takin Truck driver te chu Medical Workers, Police leh Local Task Force te ang bawka ral hmatawnga huaisen leh tawrhchhel taka pen chhuak an ni tih sawiin, ram leh hnam tana an inpekna chu ngaihsanawm a tih thu a sawi a, Mizoram mamawh phurhluh kawnga hmalatu pawl hrang hrangte inpekna ah lawmthu a sawi bawk.
He hunah hian Chief Secretary, Lalnunmawia Chuaungo pawhin Lockdown chu engtikah nge thlahdul a nih anga, hlih a nih dawn tih hriat a nih loh thu sawiin, “Tunah hian kan him thawkhat tawh angin inhre mah ila kan chhehvel min hualtute ah COVID-19 hri vei an pun chhoh zel avangin kan fimkhur a ngai em em a, tuna a lan dan chuan State pawn lam atanga rawn lut te atangin kai theihna chance a awm a ni,” a ti a. Phai lam nen kan inkalpawh lo thei silo a, phai lam atanga bungrua rawn phurhluh a ngai reng si a, phai atanga phurluttu te leh Mizoram atanga phai lama bungrua zuk la an awm reng lo theilo a, hei hi engtin nge him zawkin kan kalpui ang tih ngaihtuah a ngai a, Mizoram mi leh sa Lockdown vanga phai lama tangkhang rawn haw turte pawh an la awm a, sawrkar in ruahmanna a siamte thuawih taka mipui in kan zawm tlan hram hram rih a pawimawh dawn a ni,” a ti bawk.
He hunah hian sawrkar hotute bakah Truck neitu leh khalhtu aiawhte pawh telin Transport Department-in Mizorama bungraw phurhluh chungchanga zawm tur inkaihhruaina, Standard Operation Procedure (SOP) a rua-hman chu uluk taka sawiho a ni a, heng an sawiho atang hian sawrkar chuan SOP mumal tak a duang chhuak dawn a ni.

Comments

Chhiar Hlawhte