State pawn lama Mizoram mi la tangkhang te tanpui turin Mizoram Lok Sabha MP in a ngen

India rampum-ah Lockdown kalpui a nih tak avanga ramchhung hmun hrang hranga Mizoram mi 600 vel tangkhang mangangte tanpui turin Lok Sabha MP, C. Lalrosanga chuan State 20 chuang thuneitute hnenah ngenna a thlen.
Lok Sabha MP, C. Lalrosanga chuan Lockdown vanga Mizoram mi leh sa Mizoram pawn a tangkhangte a theih ang anga a chhui zui thu leh hmun hrang hranga la tangkhang mi 500 chuang in report an awm tawh thu sawiin, an vai chuan mi 600 vel an tlin a rin thu a sawi a, heng mi tangkhang te awmna State sawrkar 20 chuang hnenah ngenna thlenin, anmahni State theuh-a tangkhang Mizoram mite lo ngaihven tur leh a theih dan ang anga lo tanpui turin a ngen tih a sawi a. Hnam thila inthliarna leh thinhrikna laka tangkhang hote thlavang hauhsak turin State hrang hrang Chief Secretary te pawh lehkha a thawn tih a sawi bawk.
COVID-19 hripui len avanga inkharkhip chhungin Mizoram pawna tangkhang tam takin ei leh bar lamah harsatna an tawk a. Mizoram-a haw dan tur an enghelh hle bakah In luahman chungchangah harsatna an tawk tlangpui bawk. Hemi chungchang hi sawiin New Delhi a awm mek Lok Sabha MP, C. Lalrosanga chuan India ram khawpui 40 velah Mizoram khaw hrang hrang a mite chu sawrkar thupek anga inkharkhip a nih atang khan an tangkhang a. Zirlaite bakah hna nghet lo thawk chi hrang hrang thawk te, zin veivakte, damlo leh damlo buaipuitute an ni tlangpui tih sawiin, “Thlawhtheihna thlawk tihtawp thut avanga rawn haw hman ta lo, awmna mumal nei lova Mizoram House a awmta te leh thiante fin ta te pawh an awm,” a ti bawk.
Phai lama hnathawk tangkhangte hi Company, Hotel, Restaurant, Spa leh Beauty Parlour vela hnathawk, inkharkhip tak avanga an hna atanga chawlhtir leh hlawh la mumal lo, Inluah man pe theilo te leh an In luah atanga chhuahtir te an ni tlangpui a. Hnam inthliarna leh diriamna tawkte pawh an awm niin MP chuan a sawi a. Ei tur nei mumal tawhlo te an ni tih a sawi bawk.

Comments

Chhiar Hlawhte