A man to-a gas hralhna sum mipuite tan lalet

Tunhnaia eirawngbawlna Gas man tihhniam a nih hnua Mizofed Serchhip ten a man to a Gas an hralhna atangin cheng sing thum chuang chu mipui hnena peklet tura laklet sak an ni.
Serchhip District Consumers Association hruaitute hnen atanga thu kan dawn danin India sawrkar laipui chuan March 1, 2020 atangin rampum-ah LPG man chu bur khat zelah Rs. 53/- vel zelin tih-hniam a ni a, hemi ang hian Serchhip-ah chuan eirawngbawlna Gas man hi bur khat Rs. 1025/- ni thin chu Rs. 965.53 atanga 970 vel a ni a. Hetihlai hian Mizofed Serchhip Branch chuan a hmaa Gas man awmsa angin Gas man tihhniam a nih hnuah pawh hian an sem tih hriat niin mipui ten Gas man tur an chawi tur zat dik tak an chawi theihna turin hma an la zui a, hetianga hma an lakna ah hian mipui ten a chuang-a Gas man an chawi hi an laklet sak leh a ni.
Serchhip District Consumers Association hruaitute chuan eirawngbawlna Gas hi Vengchung, Field Veng leh Ramthlun Veng-a chhungkaw 218 te hnenah a man to-a sem a nih thu sawiin, hetah hian Rs. 59/- zel hisap-in Rs. 12,862/- laklet a nih thu an sawi a, Chhim Veng-ah chhungkaw 80 te tan Rs. 59/- zel hisap-in Rs. 4,720/- laklet a nih thu leh Mualcheng-ah mi 96 tan Rs. 55/- zel hisap-in Rs. 5,280/- bakah East Lungdar-ah mi 187 te tan Rs. 55/- zel hisapin Rs. 10,285/- laklet a nih thu an sawi a. Heng sum laklet te hi Gas latu mipuite hnenah semchhuah leh mek a nih thu an sawi bawk.

Comments

Chhiar Hlawhte