Latest News

Mizoram-ah Hotel, Restaurant, Tour Operator leh Tour Guide ten Registration an tih ngai tawh dawn

Mizoram-a ei leh in lamna hmun leh thlenna In, Hotel, Restaurant leh khualzin buaipuitu Tour Operator leh Tour Guide te tan sawrkar-ah registration tih vek a tul tawh dawn.
Khualzin, Tourist te behchhana Mizorama eizawngte mumal taka enkawl an nih theihna tura sawrkara an inziahluhna tur dan thar ‘The Mizoram (Registration of Tourist Trade) Bill 2020’ chu Mizoram Legislative Assembly Session neih zawh takah pass a ni a, he dan puluttu Tourism Minister, Robert Romawia Royte sawidanin Dan thar hnuaiah hian khualzin behchhan-a eizawnna chi hrang hrang te chu mumal zawka enkawl leh khuahkhirh an ni tawh ang a, Hotel leh Restaurant ang chi te chu service an pek dan mila thliar hrangin, chumi mil chuan an rate te pawh bithliah sak an ni ang a, hetihlai hian sawrkar laipui hriatpuia Hotel, Rating lo tih tawh sa te erawh a huam dawn lo thung a ni.
Hotel leh Restaurant ang chi te bakah khualzin kaihhnawiha eizawng, Tourist behchhana dawr siam emaw ang chi te pawh he Dan hmang hian sawrkarah an inziahluh vek a tul tawh dawn a, motor kawngpui sira eitur lamna hmun leh riahna hmun Restaurant leh Road Side Hotel ang chi zawng zawngte pawh Dan hmang hian ziahluh an ni ang a, khualzinte hnenah service tha ngei an pek theihna turin an tih tur chin bithliah sak vek an ni ang.
Heng bakah hian khualzin lo buaipuitu Tour Operator leh khualzin lo kaihruaitu Tour Guide ang chi te pawh Dan thar hnuaiah hian sawrkar-ah an inziahluh vek a ngai dawn a, hei hian eizawnna huang thar a siam belh beisei a ni tih Tourism Minister chuan a sawi.

Comments

Popular News (Last 30 Days)