Vawksa-ah harsatna awmlo

Serchhip Bazar-a Vawksa zuartute chuan sawrkar phalna-a phai anga Vawk lakluh theih a nih tak avangin Vawksa a harsatna thleng thin chu sutkian a nih tawh thu an sawi.

Mizoram-a Vawk natna, PRRS leng tur venna atana Mizoram sawrkar in rampawn leh State pawn atanga Vawk lakluh a khap avanga hun engemaw chen Vawksa a harsatna a thlen hnuah Mizoram sawrkar chuan State pawn atanga Vawk lakluh phalna hi pechhuakin, hemi hmang hian Vawk hrisel tha te chu State pawn hmun thenkhat atanga lakluh thin a ni a, heng vawk lakluh te hi Serchhip-a Vawksa zuartute pawhin Aizawl atanga an lak-chhawn theih tak avangin Serchhip-a Vawksa lama harsatna awm thin chu sutkian a ni ta rih a ni.

Serchhip Bazar-a Vawksa zuartute chuan heng Vawk te hi Phai-a vawk vulhna hmuna awm a nih thu leh Vety Department-a mithiam ten an endik hnuah a hrisel tha tih hriatchian te chu lalutin Mizoram thlenpui a nih hnuah pawh a hlawma dah lehin an hriselna hi enfiah leh thin a nih thu an sawi a. Chutianga a hrisel ngei a ni tih finfiah leh te chu khaw hrang hrangah lak darh thin a ni tih an sawi a, hei vang hian mipuite tan pawh Vawk hrisel sa hlir zawrhchhuah a ni tih an sawi a. Tun dinhmun ah a tlangpuiin Aizawl atang hian Vawk hi chawlhkar tin an lak thu pawh sawiin, Vawk talhtute hi Team hrang hrang anga an awm ve thu leh chawhrualin kartin Vawk 20 atanga 25 vel lalut ang an ni tih an sawi a. Heng phai atanga Vawk lakluh te hi tual vawk nen-a khai-khinin chuan in tiat rau rau-ah a man chu tlawm deuh zawka ngaih a nih thu an sawi bawk.