Bairabi-a Gas thunna tur tlawh

Mizoram sawrkarin Liquefied Petroleum Gas (LPG) bottling plant siam a tumna, Bairabi chu Thawhlehni khan Mumbai atangin Indian Oil Corporation Ltd. (IOCL) hotute chuan an tlawh a, a hmunhma leh a zauh danah an duhthu a sam tih an sawi.

IOCL Team, member 5 te hi Mizoram sawrkar hnuaia Supply Department Joint Director, Laltanpuia Hnamte chuan tawiawmin Bairabi an tlawh hma hian Kolasib-ah chawlin DC Office chamber-ah Bawrhsap, Sangchhin Chinzah hovin inkawmna hun hman a ni. Bawrhsap chuan IOCL hotute hnenah hian Fur ruahtui tlak hunah Mualkhang Bottling Plant khar (close down) tum a nih vangin Mizoram tan Bairabi-ah Gas Bottling Plant hawn a tul thu a lo hrilh a ni. Thudawn danin IOCL lam hian LPG Bottling Plant atan a lo berah ram 35 acre a ngai dawn niin sawi mahse Mizoram sawrkarin Depot hmun tur a ruahman hi ram 46 acre-a zau a ni a, a hmun hma leh a ram zauh zawng chu IOCL hotute pawhin an duhthusam a nih thu an sawi a ni.