Conovirus chungchangah sawrkar in hma la in Saiha District-ah Myanmar nen-a ramri khar a ni

Health Minister, Dr. R. Lalthangliana chuan COVID-19 (Corona Virus) laka Mizote kan fihlim theihna turin Lengpui Airport atanga khualzin lolutte endik hna kal mek chu Inrinni khan a hmunah a tlawh a, Covid-19 endikna khawl pawh Mizoram in a lei thuai tur thu sawiin, ramdang mite lo luh khap chungchang ngaihtuah mek a ni bawk.

Health Minister in Lengpui Airport a tlawhna ah hian Airport thuneitute chuan tun dinhmunah Lengpui Airport-ah hian Airlines Flight 6 a awm mek tih sawiin, khualzin lo tum te nitin mi 300 atanga mi 500 vel chu an dinhmun Health & Family Welfare-in an endik mek a, Airport-ah hian an khawsik leh sik loh enna khawl hmangin Doctor leh Nurse ten an lo endik thin tih Health Minister hi an lo hrilh a. Health Minister hian Airport chhunga Covid 19 chungchangah rinhlelh leh endik ngai bikte dah hranna tur a hranpa a siam, Sample Test leh Collect-na tur siam mekte a enfiah nghal a, Civil Aviation hotute nen a tul anga hmala a siam nghal turin ruahmanna an siam nghal bawk a ni.

Tun dinhmunah Lengpui Airport-ah hian Covid 19 endiktu tur Medical Duty 7 an awm a, Aviation lam duty 20 vel awmin, Health Minister chuan a tul angin thawktute dah belh an nih tur thu a sawi a. Coronavirus laka tuna Mizoram in a tih theih chu an thisen lo lak a, phai lama thawn a ni mai a, hei vang hian Health Minister chuan a endikna khawl pawh Mizoram in a lei thuai tur thu a sawi bawk a ni.

Home Minister, Lalchamliana chuan Coronavirus leng chu Mizoram-a a luh ve lohna tura invenna chi khat atan ramdang mite Mizoram luh khap ni se tih chu ngaihtuah mek a ni tih sawiin, Chief Minister sawipui thuai a tum thu a sawi a. Health Department lam pawhin ramdangmi luh khap chungchang hi tunhnai khan an lo sawiho tawh niin Official-te chuan an sawi a, mahse hemi kawnga hmalatu tur dik tak chu Home Department a nih avangin anni lam ngaihchan rih an rel niin an sawi a. Ramdangmi lo luh hi khap a nih dawn chuan thuneitute'n thupek siama an tih a ngai dawn a. Ramdangmite Mizorama an lo luh khuahkhirhna dan Protected Area Permit awm thin chu kum 10 vel lai sorkar laipuiin a thlahdul tawh a ni.

Hetianga Conovirus chungchanga hma lak a nih mek lai hian Siaha District Magistrate chuan Inrinni khan thupek tichhuakin Siaha District-a Border Crossing Point an neih khua- Lopu, Chapi, Khaikya, Zyhno, Lodaw, Lomasu, Lana, Siasi, laki leh Khopai te chu ramri kan-a Myan-mar nen intlawhpawhna khua a ni tih tarlangin, heng khua leh Myanmar inkar te chu khar nghal a nih thu leh ramri kaltlanga inkalpawh phal a nih loh thu a tarlang a. Hei bakah hian Kaochao, Tipi Ferri leh Siahatla-ah te Check Post siam nghal tur a nih thu a tarlang bawk.