Solid Waste Management Centre-a hna enfiah a ni

Mizoram State Project Monitoring Committee (MSPMC) chuan Hualngohmuna hmalakna kal mek, ‘Construction of Solid Waste Management Centre: Phase-I’ chu Zirtawpni khan an tlawh.

Hmuhma leh hmalakna te an en hnuah MSPMC Vice Chairman R. Lal Rinawma IRS (Rtd)  chuan a hmunhma chu tangkai thei ang bera hman a tul thu a sawi a. Hna tithuanawp thei, Clearance leh thil dang a awm a nih chuan tihfel vat a that thu sawiin, bawlhhlawh tawih thei lo awlsam leh felfai zawka thliar anih theih dan tur te, tawih thei khawl hmanga chak leh awlsam zawka tawih raltir theih dan tur, Mechanical Compositing-te chu a hmunah Engineer leh Contractor-te ho nen an sawiho a. Tun dinhmunah chuan Phase-II hna kalphung awm dan tur azirin assessment neih leh phawt a that thu a sawi bawk.

‘Construction of Solid Waste Management Centre: Phase-I’ hi Special Assistance to States for Capital Expenditure (SASCE) hmanga cheng vbc. 16.64 semga thawh niin PWD chu Implementing Department a ni a. Phase-I hi kalpui mek niin chu chuan building sak leh kalpawhna kawng siamna te a huam tel a ni.