Presbyterian Kohhran ten Bial Inkhawmpui an nei

Presbyterian Kohhran hnuaia Pastor Bial Inkhawmpui chu nimin Pathianni hmang khan Pastor Bial hrang hrangah neih a ni.

Mizoram Synod hnuaia Pastor Bial Inkhawmpui hi Zirtawpni kalta atang khan Pastor Bial hrang hrangah neih niin Zirtawpni zan khan Report hrang hrang ngaihthlak a nih hnuah Inrinni khan Rorel Inkhawm neih a ni a, Inrinni zan atangin Pathian Biak Inkhawm neih niin nimin chawhnu lam khan Lalpa Zanriah Sakramen kilho a nih hnuah nizan khan Bial Chairman kalchhuak ten Pathian thuchah an sawi hlawm bawk a ni.

Serchhip-a Presbyterian Pastor Bial hrang hrangah pawh Bial Inkhawpui hi neih a ni a, Serchhip Pastor Bial Inkhawmpui vawi 90-na chu Serchhip Kawnpui Kohhran Biak In-ah neih niin New Serchhip Pastor Bial Inkhawmpui vawi 32-na chu Bukpui Kohhran Biak In-ah neih a nih bakah Serchhip Vengchung Pastor Bial Inkhawm-pui vawi 22-na chu Serchhip Bazar Kohhran Biak In-ah neih a ni bawk a. Chhiahtlang Pastor Bial Inkhawmpui vawi 40-na chu Sailam Veng Kohhran Biak In-ah neih niin Chhiahtlang Kawn Veng Pastor Bial Inkhawmpui vawi 9-na pawh Chhiahtlang Chhim Veng Kohhran Biak In-ah neih a ni bawk.