Car Loan hmanga inbumna Police ten chhuichhuak

Car loan pechhuak thin Mahindra & Mahindra Financial Service Ltd. hnuaia hnathawk thenkhat leh Mizoram-a Car Dealer 5 ten loan lem hmanga cheng vbc. 150 vel an tih chingpen chungchang chu Mizoram DGP Anil Shukla chuan Zirtawpni khan thuthar thehdarhtute hnenah a sawifiah.

He sum tihchingpenna ah hian a bultumtu ber chu MMFL hnuaia Mizoram Area Business Manager, Jakir Hussain (41), Tejpur Assam mi niin a thurualpui mi 10 te chu man an ni tawh a, mi paruk Jail-ah dah an ni tawh a, mi panga te chu thu zawhfiah atan Police in an la kawl a, mi 11 an man zingah hian hnamdang mi pasarih leh tualchhung mi 4 an tel a ni.

Mizoram DGP sawi danin, kumin March ni 20 khan Ankit Bagree, Circle Head of MMFL chuan sum chingpen ni a rinhlelh a awm tiin Aizawl Police Station-ah thubuai a ziaklut a, complaint-ah hian Mizorama an Area Business Manager, Jakir Hussain-a’n sum leh pai a tihchingpen thu a thlen a. FIR thehluh hi bawhzui nghal a ni a, sum a tam tham avangin CID (Crime) SP kaihhruaina hnuaiah Special Investigation Team (SIT) din nghalin, a chhuichhuah hna hi anni hian an thawk ta a ni.

DGP sawi danin, Jakir Hussain leh a thurualpuite hian document lem chi hrang hrang 2000 dawn hmangin MMSL-ah hian Car Loan an lachhuak tawh a, Aizawl-a Car dealer CK Motor, Hyundai, NBE Tata, Rafael Nissan, Aidu Motor Renault leh Standard Motor-Three Wheeler te pawh he thil ah hian an inhnamhnawih a, anni ho nen hian inthurualin document lem an siam a, a lem vekin thil an kalpui ta a, Mahindra Finance Ltd tih hmingin account an hawng a, heng Car Dealer te nen hian he account hi an hmang ta a ni. Police-te hian Bank Account 26 atangin cheng vbc 2.5 an freeze tawh a, Car brand chi hrang hrang 15, cheng vbc 3 hu an man tawh bawk a, heng bakah hian Laptop 3, Mobile Phone 10, File lem 549, Seal lem 25, Sim Card 30 chuang leh thil chi hrang hrang engemaw zat an man tel bawk a ni.

MMFL hian thil diklo a awm tih an hriatchhuah dan chu, Mizoram-a mihring cheng zat ngaihtuahin car loan dil an tam lutuk chu an ringhlel a, amaherawhchu Jakir Hussain leh a thurualpui te hian rinhlelh an kai loh nan a khat tawka loan an rulh ve reng avangin an hrechhuak mai lo zawk a ni.