ZOHANDCO buatsaih MadebyMizo Kiosk, Bangalore hawng

Mizoram Handloom & Handicrafts Development Corporation Ltd. (ZOHANDCO) din Mizo thil siamchhuah zawrhna dawr tur, ‘MadebyMizo Kiosk’ chu Inrinni khan ZOHANDCO Chairman JK,. Dawngzuala chuan M5, E-City Mall, Bengaluru-ah a hawng.
MadebyMizo Kiosk hi Ministry of MSME, Government of India hnuaia Scheme, Raising & Accelerating MSMEs Performance (RAMP) hmang a din a ni a. He kiosk din nan hian Rs. 17,48,962/- hman a ni a. ZOHANDCO hi Commerce, Industries, Geology & Mining Department hnuaiah RAMP scheme a component pakhat MZ4 – Marketing Intervention bikah Implementing Agency a nih angin, he kiosk hi a din a ni.

August thla khan MadebyMizo Kiosk, New Delhi-ah hawn a lo ni tawh a, Kolkata hmalakna kalpui mek a ni a. MZ4 – Marketing Intervention hnuaiah hian Mizo zawng zawng te hman theih tur Made by Mizo Brand siam a ni a, hei hi Common brand a niin, registered Brand erawh a ni lo a. He Brand hnuaiah hian Mizo te’n an mahni pual Brand bil hmang tho in, market an kalpui thei dawn a ni. Made by Mizo Brand a nih ang ngeiin, khawvel pum-a Mizote a huap vek a ni. Ram leh ram indaidanna in Mizo te min phuar loh nan online hmanga kan inhmantawm theih tur madebymizo.com, e-commerce website hawn a lo ni tawh bawk a ni. He website a inziaklut Mizote thil siamchhuah offline-a zawrhchhuah nan heng kiosks te hi din an ni a, madebymizo.com website kaltlang a bungraw hralh a nihin, heng kiosks te delivery centre an ni nghal dawn a ni.