Sangha wholesale market atan inbuatsaih mek

Fisheries Department Director Zonuntluangi chuan, “Sawrkar laipui puihnain Mizoram-ah Sangha Wholesale Market siam turin kan in buatsaih mek,” a ti. Zirtawpni kaltaa Mizoram Cooperative Fish Farming Marketing and Processing Federation Ltd. (ZOFISHFED) Annual General Assembly vawi 6-na chu Managing Director, T. Vanlalkima kaihhruaiin Aizawl-a BSI Hall-ah neih a ni a, he hun a hmanpuina hian Fisheries Director chuan, “Mi tam takin Phai lam Sangha ni lovin Mizoram-a Sangha tharlam ei an chak a, mahse kan la intodelh loh avangin duh ang lei tur a la awm lo a. Sangha khawia eizawng ten intodelh tura tan an lak chuan Sangha thar a pung dawn a, chumi tur chuan kan zavaia kan tan tlan a ngai a ni,” a ti a. Mizoram sangha tharchhuah zinga 60% vel chu State dangah a kal nia sawiin, hemi tireh tur hian tan lak a pawimawh tih a sawi a. Fisheries department chuan Tuirial leh Serlui tuikhuahah te sangha khawi (cage culture) kalpui leh a tum tih a sawi bawk.