SVAMITVA Scheme Meeting-ah LR&S Minister a tel

Nimin khan New Delhi-a Bharat Mandapam-ah Union Ministry of Panchayati Raj huaihawt in State hrang hranga ‘Survey of Villages Abadi and Mapping with Improvised Technology in Village Areas- SVAMITVA Scheme’ kalpui tawh dan leh hmabak sawihona neih a ni a, Mizoram atangin Revenue Minister B. Lalchhanzova leh Secretary, Vanlalmawia IAS te an tel.


Nimin-a he sawihona ah hian Land Revenue & Settlement Department Minister, B. Lalchhanzova chuan SVAMITVA Scheme chu central Scheme danglam bik a ni tih sawiin. Mipui ten an ram neih te Drone hmanga survey sak an nih hnua Property Card pekchhuah a ni chuan thingtlanga chengte chu nasa takin a chawikang mek a. Heng Property Card hmang hian ram neitu nihna nghet an neih bakah loan lak nan te a mipuiin an hmang tan chu lawmawm a tih thu a sawi a. Mizoram chu SVAMITVA scheme kalpui chak leh kalpui tha ber te zing ami a nih thu sawiin, India hmarchhak-ah phei chuan Property Card pe chhuak thei hmasa ber a nih thu a sawi a. Revenue Administration-ah Mizoram chu State dangte aia bul tan tlai ni mah se SVAMITVA Scheme-ah chuan a hmahruaitu, State dang te entawn tlaka hma an la chu an inchhuang ve hle tih a sawi a, hei hi Sawrkar Official leh mipuite thawhhona tha tak a awm avanga thleng thei a ni tih a sawi bawk.

He hunah hian Revenue Minister B. Lalchhanzova chuan Department of Land Resources hnuaia Central Sector Scheme DILRMP chhunzawmna, DILRMP 3.0 hnuaiah Mizoram pawhin sanction an hmu ve leh tan tih sawiin. 1st installment Rs. 52,62,750 an dawn thu a sawi bawk a, he Scheme hmang hian Mizoram-a Revenue Administration tihchang-tlunna hmalakna kalpui chhunzawm a ni ang. Nimin-a he hun hman hi Panchayati Raj Minister, Rajiv Ranjan Singh chuan a kaihruai a ni.