Operation Jericho 2 kalpui chhunzawm mek niin Operation Jericho-ah ruihhlo man a tam

Mizoram sawrkar chuan ruihlo dona kawngah nasa lehzuala beihpui thlak thar leh tul tiin November ni 1, 2026 atang khan Operation Jericho 2 a kalpui leh mek a. Hetihlai hian Operation Jericho hnuaia ruihhlo man tawh zawng zawng hlutna chu chen vbc. 843.47 a tling.

Police Department tarlan danin, Hunpui a lo hnaih leh tak avangin Mizoram sawrkar chuan ruihlo dona kawngah nasa lehzuala beihpui thlak thar leh tul a ti a. November ni 1, 2026 atang khan 1st Bn. MAP, 3rd Bn. MAP, 1st IR Bn. leh 5th IR Bn. te tir chhuakin Operation Jericho 2 a kalpui chhhunzawm a. He beihpuiah hian District SP theuhte kaihhruaina hnuaiah tualchhung tlawmngai pawlte leh a kaihhnawih pawl hrang hrangte nen thawk hovin District hrang hrangah kalpui a ni ang.

Ramri hrula District-te chu ruihhlo lakluh, tawlhruk, leh ramchhung hmun danga thawnkual tur venna kawngah an pawimawh avangin ngaihpawimawh bik an ni a. Intelligence hman tangkai te, Agency hrang hrang thawhhona tihchak lehzual te, ramri venhimna te leh mipuite nena ruihhlo dona kawnga thawhhona tha lehzual neih te chu he beihpui hlawhtlinna atana lungphum pawimawh leh ngaihpawimawh a ni dawn a ni.

Beihpuithlak hlawhtling tak neih a nih theih nan Mizoram sawrkar chuan NGO, YMA, VDP leh khawtlang tlawmngai pawl hrang hrangte thawhpui atan a sawm a. Ruihlo tawlhruk, zawrh leh a kaihhnawih thil eng pawh thuneitute hnena hriattir thuai thin turin mipuite a ngen bakah, theihtawpa Police-te thawhpui turin a ngen bawk.

Operation Jericho hi September ni 1, 2025 khan Mizoram Police, Excise & Narcotics Department leh Central Young Mizo Association (CYMA) te thawhhonain neih tan a lo ni tawh a. October ni 26, 2026 thleng khan he hmalakna kaihhnawihah hian thubuai 447 ziahluh tawh niin mi 663 man an ni tawh a, ruihlo man zawng zawng hlutna chu cheng vbc. 843.47 a tling tawh a ni.