The Mizoram Victims of Crime Compensation Scheme zirhona leh zangnadawmna semna hun hman a ni
Serchhip DC Pisapui Hall-a 'Sensitization Programme on The Mizoram Victims of Crime Compensation Scheme, 2011' ah hian Chief Minister Lalduhoma chuan Mizoram-a Court te tihchangtlunna atan sawrkar in hma a lak mek thu sawiin, an sawrkar chhungin District Court leh High Court-a hnaruak tam tham tak dahkhah ni tawhin, Post thar tam tak an siam tawh bawk tih a sawi a. Kum 2023 December atanga tun thleng hian District Judicial Infrastructure atana Central leh State Share pekchhuah tawh zat chu cheng nuai 3937 a ni tawh tih sawiin, Serchhip District Court pawh a lo changtlun zawk theih nan MJS Grade-I leh Supporting Staff dah an rilruk mek tih a sawi a. Champhai leh Aizawl-a Exclusive ND&PS Special Court din turin Judge leh Supporting Staff post ruahman fel a ni tawh a, District thar 3 - Khawzawl, Saitual leh Hnahthial Court Building leh Judicial Quarters sakna tur hmun Sawrkarin a ruahman fel tawh tih a sawi bawk a. Kolasib-a Fast Track Court Building pawh sak zawh a nih tawh thu sawiin, a function theihna tura sum mamawh zat PWD-in an chhut mek tih a sawi a. Mipui vantlang leh Mizoram Bar Association Sub-Hqrs. Lungleite ngenna ngai pawimawhin, Lungleia District Court Building sakna turin sawrkarin Salem Veng, Lunglei-a IPR & PS ram ruahman sak a remti tih a sawi bawk.
Victim of Crime Compensation atan hian an sawrkar hnuah cheng nuai 967.80 an ruahman tawh tih Chief Minister chuan sawi bawkin, Crime Compensation Scheme hi Section 375A of CrPC hnuaia kalpui thin niin, July 2024 atang khan Section 396 of the Bharatiya Nagarik Suraksha Sanhita (BNSS), 2023 hnuaiah a awm tak thu sawiin, “Rorelna dik chuan thil sual titute hremna pekah duh tawk mai lovin, an thil sual tih tuartute tanpui leh chhawmdawl pawh a huam tur a ni tih hi he Scheme innghahna bulpui a ni,” a ti a. Tun tuma zangnadawmna dawngtute chu a lainat thu sawiin, beidawng lo tura a ngen bakah taksa leh rilru hrisel tak nei zui turin duhsakna a hlan bawk.
He hunah hian Justice Michael Zothan-khuma, Judge-in-charge Administration, Gauhati High Court & Executive Chairman, Assam State Legal Services Authority chu Khual Zahawm niin ani bakah hian Serchhip Bawrhsap, Paul L. Khuma pawhin thu an sawi a, Pawikhawihna (crime) tuartute tana tanpuina leh chhawmdawlna awm thei chungchangte zirho niin, Serchhip District Court-a Judicial Magistrate H.T. Lalmawizuala hnen atangin ‘The Mizoram Victims of Crime Compensation Scheme 2011’ leh a kaihhnawih dan pawimawh dangte ngaihthlak a ni a, zawhna leh chhanna hunte hman ho ni bawkin, pawikhawihna tuartu (Victims of Crime) mi 20-te hnenah zang-nadawmna cheng nuai 53.7 semchhuah a ni.
The Mizoram Victims of Crime Compensation Scheme, 2011 hi tualthah, pawngsual, naupang khawihchhiatna, POCSO kaihhnawih, Acid attack leh pawikhawihna dang tuarte leh an chhungte tan zangnadawmna pekna tura duan a ni a. A tawrh dan a zirin zangnadawmna hi Rs. 50,000 atanga Rs. 3,00,000 leh kumtling lo te hnenah hemi aia tam thleng hian pek theih a ni a, District Legal Services Authority (DLSA) kaltlanga dil tur niin Pawikhawihna thlen atanga thla ruk (6) chhungin dil theih a ni.
Nimin-a he hun hman hi Julie Lalrinzami, Addl. District & Sessions Judge, Circuit Court, Serchhip chuan kaihruaiin CJM, Lalrochami chuan lawmthu a sawi bawk a ni.


