Budget-a SMS dah vangin Scholarship pek a awlsam phah tih H&TE Minister in a sawi
Tunhnaia chanchinbu mite a kawmna ah H&TE Minister Dr. Vanlalthlana chuan Scholarship chungchanga an hmalakna te tarlangin, “Post Matric ST Scholarship hnuaiah hian academic year 2025-26 atana dil te kumin 2026-27 hian sem a ni a. Diltu 32,375 zingah 31,830 pek tawh an ni a, a bak mi 545 te hi an Aadhaar leh Bank Account lam felloh avangin la pek theih rih lo an ni a, kan achievement percentage chu 98.32% a ni,” a ti a. “Tunah hian kum 2026-27 atana application khar fel chiah a ni a, application lo lut tawh zat chu 37,592 a ni a, kum hmasa lam aia kan thanna chu 14.91% a ni,” a ti.
Pawl 9 leh pawl 10 ten an dil thin Pre Matric ST Scholarship chu Academic year 2025-26 atana dil te kumin 2026-27 hian sem a ni tih Minister chuan sawiin, “Diltu 8875 zingah 8045 pek tawh an ni a, a bak mi 830 te hi an Aadhaar leh Bank Account lam felloh avangin la pek theih rih lo a, kan achievement percentage chu 90.64% a ni. Tunah hian kum 2026-27 atana application khar fel chiah a ni a, application lo lut zat chu 10825 a ni. Kum hmasa lam aia kan thanna chu 19.8% a ni,” a ti bawk.
Scholarship dang chungchang sawiin H&TE Minister chuan, “Merit Scholarship hi Post Matric zirlai thiam thei bikte puala State Scheme a ni a, kum 2026-27 hian nikum 2025-26 atana diltu mi 108 zingah mi 96 chu dawng tura thlan fel tawh niin sem mai tura ruahman mek a ni. National Means Cum Merit Scholarship Scheme hi Department of Education, Govt. of India in a pek thin a ni a. He Scheme dil tur hian Govt. School/Govt. Aided School leh Local Body School-a Class VIII zirlai te’n kumtin an exam thin a. A tlingte chuan Class IX an nih atangin an dil tan a, Class XII an nih thlenga renew theiin kumtin Rs. 12,000 an dawng thin a ni. Nikum 2025-2026 atana dil thei zat mi 244 an ni a, an vai hian scholarship hi an dawng tawh a ni,” a ti bawk.