A nupui thattu-a puh Court in thiamloh chantirin damchhunga lung in tang turin a hrem
Nikum February ni 15 zan khan Lalsiamliana hian a nupui Rebek Chanchinthathangi chu an in kawtah thingin a lu-ah a vua a, a hrawkah thirlenin a thlung a, kawrah a hnuk thla a, a ruang hi an In atanga metre 100 vel-a hlaah hmuh a ni a. A tuk February ni 16 khan Kulikawn Police Station-ah BNS Section 103(1) leh Section 64(1) hmangin tualthah leh puangsual thubuai ziahluh a ni a. Thuhretu mi 17 zingah mi 16 chu Court-ah thu sawi turin an inlan a. Thuhretute sawi leh finfiahna hrang hrangte atangin Court chuan Lalsiamliana chu BNS Section 103(1) hnuaiah thiamloh a chantir a. Damchhung lung In tang tur leh Rs. 50,000 chawi turin a hrem a, pawisa hi a chawi thei lo a nih chuan thla 5 dang a tan belh a ngai dawn a ni.
Lalsiamliana chuan a nupui che thei tawh lo chu mipat hmeichhiatna a hmanpui ngei tih inpuang mah se Forensic lam atangin amah ngei a ni tih duhthusamin finfiah theih a ni lo thung a. BNS Section 63 in pawngsual a sawifiahnaah khung theih ni mah se, Exception 2 chuan hmeichhia (nupui) chu kum 18 tling lo anih chauhin pawngsual a tling a, nupa inkarah chuan kum 18 chung lamah pawngsualah a ngai lo thung a. Hei vang hian Court chuan thiamloh a chantir thei ta lo a ni.