ZMC atangin mi 287 ten MBBS zirchhuak tawh

Zoram Medical College & Hospital (ZMC&H) atangin zirlai (MBBS) 287 an pass chhuak tawh a, chung zinga zirlai 53 te chu Mizoram pawn atanga zir an ni.
Health Department tarlan danin, ZMC&H atanga zirchhuak MBBS te hi Compulsory Rotating Medical Internship ti tawh vek an ni a. ZMC&H-a MBBS zirlai hmasa ber (2018 batch) te result chu April ni 11, 2023 khan tihchhuah a ni a. Exam beitu zirlai 95 zingah mi 68 ten hlawhtlinna changin, pass percentage hi za zela 71 a ni .

Health Minister Lalrinpuii chuan ZMC&H atanga MBBS zirchhuak te chuan Doctor indaihlohna pawh engemaw chen chu an phuhruk ngei a ring tih a lo sawi tawh a. Mizoram sawrkar chuan MBBS an zir theih nan theihpatawp a chhuah pui a, zirtirtu tha tak takte a rawih bakah Fee pawh a tumsak a, chuvangin Mizoramin an thiamnate a mamawh hunah tlanchhe mai lova, bond (inremna) an ziah chu puitlin vek turin a chah a. Zirlaite hian an zir zawh hnuah kum hnih (2) chhung Mizoram sawrkar hnuaia thawk turin inremna hi an zir hmain an lo ziak tawh a ni.

Mizoram in Medical College a neih chhun hi din tirhah Mizoram Institute of Medical Education and Research (MIMER) tih a ni a, kum 2019-ah Zoram Medical College (ZMC) tia thlakin a hnuah Zoram Medical College and Hospital (ZMC&H) tiin thlak leh a ni.