Vairengte-ah 'Inter-State Border Festival' neih a ni
Nimin-a 'Inter-State Border Festival' neih hi Kolasib Addl. DC B. Malsawmtluangi leh Lalmuan Puia, Project Director DRDO ten kaihruaiin Assam atangin Dholai Bialtu MLA Amio Kanti Das, Cachar DC Rahul Kumar Gupta IAS leh Cachar SP Partha Protim Das IPS te hovin sawrkar Official, infiammi leh Hnam Lam entirtu (cultural troupe) thahnem tak an lo tel a. He huna khuallian Mizoram Deputy Speaker leh Kolasib Bialtu MLA Lalfamkima chuan he hun hi State inhnaih tak pahnihte tan inzawmna tha zawk thlentu a nih a beisei thu a sawi a. “Administration thil ah ramri (border) hranin awm mah ila, kan thawhhona leh ralmuang taka kan awmhona hi a chhe tur a ni lo. Kan that tlan nan kan thawhho a ngai a ni,” a ti.
He hunah hian Dholai MLA Amio Kanti Das pawhin State pahnihte inunauna atana he hun hman chu a pawimawh thu a sawi a, chu mai bakah Hmarchhak (North East) hmasawnna atan pawh thil tangkai tak a nih thu sawiin, he Festival hian thawhhona tha zawk leh boruak muanawm a thlen zel a beisei thu a sawi bawk a. Cachar DC Rahul Kumar Gupta pawhin Mizoram leh Assam mipuite chu inmamawh tawn reng an nih thu a sawi a. “Hnam ziarang (culture) leh infiamna (sports) te hian min phuarkhawm a, hei hi kan thangtharte pawhin an chhawmnunga, an ken chhoh zel a pawi-mawh hle a ni,,” a ti bawk.
Nimin-a hun hman ah hian Cachar leh Kolasib atanga lo kal Cultural Troupe-tein hnam lam entirin zaithiamte hla sak ngaihthlak a ni bawk. Inthianthatna tichak turin infiamna chi hrang hrang—Badminton, Futsal, Table Tennis leh Volleyball khelin hlim takin hun hman a ni bawk.