Prime Minister in PM-KISAN semchhuakin KVK North Vanlaiphai atangin lo zawm a ni

Ramchhunga loneitute tan PM-KISAN chu a tum 24-na atan nimin Oct. 30, 2026 khan Prime Minister Narendra Modi chuan a semchhuak a, he hun hi KVK Serchhip District pawhin North Vanlaiphai-ah an lo hmang a ni.
Prime Minister Narendra Modi hian Bhildi, Banaskantha District, Gujarat atangin PM-KISAN sum dawngtu turte hnenah August 2026- November 2026 inkar atan semin KVK Conference Hall N. Vanlaiphai-a hemi puala hun hman hi Dr. C. Lalremruata, SMS (Animal Science) KVK chuan a kaihruai a, KNK North Vanlaiphai-a Sr. Scientist & Head, Dr. T. Vanlalngurzauva chuan PM-KISAN a inziahluh chungchanga hriat tur tul zualte tarlangin, KVK hmang tangkai deuh deuh turin kalkhawmte a sawm nghal bawk a ni.

Nimin-a he hun hman hi North Vanlaiphai Village Council-II a President Lalmalsawma Sailo chuan khuallian nia hmanpuiin he huna tel te chu PM-KISAN hmang tangkai turin a sawm a, kuthnathawktu ten KVK North Vanlaiphai-a thawktute inpekna leh an zirtirna tha tak tak an dawn thin avanga lawmthu sawiin, hmalam hun zelah pawh Department thawhpuitu thiam turin a chah a, Village Council pawhin khawtlang hmasawnna tur atan KVK te chu kawng hrang hranga thawhpui an inhuam thu a sawi bawk.

District Agriculture Offider (DAO) Office, Serchhip District, ATMA, Serchhip District leh KVK Serchhip District ten hemi puala hun an hman ah hian KVK-a Farm Manager, Prakash Thapa chuan PM-KISAN chungchang sawifiahin, tun tuma Prime Minister-in kuthnathawktute tana sum a pek hi a vaiin cheng vbc. 18,690 anih thu leh kuthnathawk mi vbc. 9.34 in he hamthatna hi an hmuh tur thu a sawi a, PM-KISAN sum semchhuahna hman anih rual hian hmasawnna lungphum te, hmasawnna tur project a hawn te leh hmasawnna ruhrel ram mi te tana hlanna a neih thu bakah Rel Service thenkhat vailiam a nih thu te a tarlang bawk.

Nimin-a PM-KISAN semchhuahna hun hi Mizoram hmun hrang hrangah pawh an lo chhim a, Agriculture Directorate atang pawhin Agriculture Minister, PC. Vanlalruata hovin an lo chhim a. PM-KISAN hi kumin 2026 hian tum hnih semchhuah tawh niin, tun hi a tum thumna tur a ni a. A tum thumna ah hian Mizoram atanga thlai leh ranvulh a eizawng chhungkaw 1,27,064 te hnenah Rs. 25,59,62,000 semchhuah tura ruahman a ni.

PM-KISAN hi Central Flagship programme niin kum 2019 atanga bul tan a ni a, hemi Scheme hnuaiah hian thlai leh ran enkawl a eizawng tin hnenah kumtin Rs. 6,000/- pek thin an ni a. Tanpuina an dawn hi thlai leh ran enkawlna atan a mamawh thenkhat leina tur a ni. Kum 2019 atanga Mizoram farmers te hnena PM-KISAN tanpuina pekchhuah tawh zawng zawng hi cheng vbc. 551.010 a tling tawh a ni.