Tun thla ah ruang 196 phurhna sum pechhuak tawh

Social Welfare Department chuan khualkhua a thi ruang phurhna man a tum sakna, ‘Assistance for Transportation of Bodies of Deceased Persons’ hmangin tun thla (October)-ah ni 8 chhungin ruang 196 phurhna atan Rs. 20,95,635 a pechhuak.
Social Welfare Department hian kum 2024 September thla atang khan Mizoram sawrkar ruahman angin khualkhuaa thite ruang phurhna senso diltute hnenah ruang phurhna senso tum sakna atan pawisa a pe thin a: hemi atan hian Mizoram sawrkar chuan kum 3 chhungin kumtin budget-ah cheng nuai 500 theuh a dah tawh a ni.

Ruang phurhna bill hi tun thla October chhung hian vawi hnih pekchhuah a ni tawh a, a vawi khatna ah ruang phurhna lirthei neitu mi 35 hnenah ruang 117 phurhna senso atan Rs. 12,10,576 pekchhuah a ni a; a vawi hnihna ah ruang phurhna lirthei neitu mi 27 hnenah ruang 79 phurhna senso atan Rs. 8,85,059 pekchhuah leh a ni bawk.

Heng ruang phurhte hi Mizoram chhung hmun hrang hranga damdawi In - ZMCH (Falkawn), Civil Hospital Aizawl, Ebenezer Medical Centre, Greenwood Hospital, Synod Hospital Durtlang, Cancer Hospital leh damdawi In dang dang atanga phurhchhuah an ni hlawm a; phurhna senso hi State Transport Authority (STA) rate behchhana chhût niin, ruahmanna awm angin lirthei khalhtu leh buaipuitute hnenah sum hi pek a ni.