Thalaite hlawhtlinna sawrkar hna an hmuh leh hmuh loh atanga teh tur a ni lo tih sawi
Govt. Aizawl North College ten ni hnih awh ‘Youth and Culture in Northeast India : Intersections and Perspectives’ tih thupui hmanga Seminar an buatsaih kharna hun Zirtawpni kalta-a a hmanpuina ah LESDE Minister chuan he hun buatsaihtute chungah lawmthu sawiin, thalaite hmasawnna chu Northeast India hmasawnna a ni tih hrechiangtute ni-a a hriat thu a sawi a. Culture kan tih chu thil sawhsawn theih loh, hmana kan tih tih dan ringawt a nih loh thu sawiin, hun azirin a than danglam ve zel thu a sawi a. Chuvangin Mizo hnam ziarang kan tih chu thangtharte than ruala thang vel zel a nih avangin thalaite chuan tunlai nunah an sengluh thiam a pawimawh hle thu a sawi a ni.
LESDE Minister chuan thalaite hlawhtlinna chu sawrkar hna an hmuh leh hmuh loh ringawta teh tur a nih loh thu pawh sawiin an thiamna leh tuina zawng tak hmanga ei an zawn theih chu a pawimawh zawk thu a sawi a. Tun maiah pawh India ram aiawha chhuak, Asian Games Hockey Tournament-a Gold Medal la thei Mizo hmeichhia pahnih ngawt mai kan nei chu Mizote'n theihna kan neih san zia tilangtu chiang tak a nih thu sawiin, thalaite'n an thiamna leh theihna te an haichhuah theihna turin Tourism bakah kawng hrang hrangah hma an lak zel tur thu a sawi a. Thalaite chu eng hna nge an zawn ang tih inzawt lova, ‘Engtin nge thil chhenfakawm leh hlu ka siam theih ang?’ tih inzawt fo zawk turin a chah a. Chumi ti thei tur chuan hnamdang tih dan ringawt entawn mai lova, mahni ram leh hnam ziarang hrechiang a, a mawina leh hlutna haichhuah tum zawk turin a chah a ni.
He Seminar-ah hian mithiam hrang hrang ten paper an buatsaih chu zirho niin Conference Report ngaihthlak a ni bawk.