P&E Veng Branch in YMA Membership Fee leh Thlanmual Fund pe let

Serchhip P&E Veng Branch YMA chuan an huamchhunga chhungkaw pakhat chu ruihhlo kaihhnawih avangin YMA Membership Fee leh Thlanmual Fund te an pekir.
Thudawn danin Serchhip P&E Veng Branch YMA hian an huam-chhunga cheng R. Lalengmawia (Titea) te chhungkua chu ruihhlo leh a kaihhnawih ah inhnamhnawih lo tura ngenna leh fuihna nena an kawm hnuah pawh YMA te ngenna ngai pawimawh lova ruihhlo kaihhnawiha an inhnamhnawih chhunzawm zel avang leh man hial tawka P&E Veng hming an tih hliau avangin an chungchang hi Branch YMA Executive Committee chuan a ngaihtuah a, P&E Veng Branch YMA-a Membership Fee an pek leh Thlanmual Fund an pek te chu pek kir leh nise ti-a an rel angin Membership Fee leh Thlanmual Fund hi tunhnai khan an pelet leh a ni.

P&E Veng Branch YMA Kumpuan Committee leh VDP Sub-Committee chuan an Veng huamchhungah ruihhlo lakluh leh zawrh khap tlat a nih thu sawiin, zanrei-a buaina leh bengchheng siam thin te leh ‘spot-na’ atana hmang thin te chu thuneitute hnenah hlan zel an ni dawn tih an sawi a. Hetianga vengchhung mipuite tana harsatna siam thin te chu hruaitute hriattir thin turin an veng mipuite an ngen bawk.