Lok Sabha MP hovin Serchhip-ah DISHA thutkhawm neih a ni
Serchhip DC Pisapui Hall-a DISHA thutkhawm hi an Chairman leh Lok Sabha MP, Richard Van-lahmangaiha chuan telpuiin DISHA chu Central sawrkarin a ngaih pawimawh thu sawiin, India sawrkar programme leh scheme hrang hrangte a hlawk thei ang bera hman a pawimawh thu a sawi a. Sawrkar laipui scheme-te tih hlawhtlin a nih theih nana thawktu Department hrang hrangte chungah lawmthu sawiin, neitu thinlung pua thahnemngai taka thawk zel turin a fuih a. Department hrang hrangte harsatnate ngaihthlak sakin, an hmalak lehzelna turah harsatna an neih chuan inthlahrung lova a hnen thlen hreh lo turin a chah bawk.
He hunah hian Serchhip Bawrhsap leh DISHA-a Member Secretary, Paul L. Khuma chuan DISHA Meeting chu Department hrang hrang ten eng nge an tih theih tihte inhriattawnna tha tak a nih thu sawiin, Department hrang hrangte thawhho theihna lai zawnna pawimawh tak a nih thu a sawi bawk.
Nimin-a DISHA thutkhawmah hian Centrally Sponsored Scheme (CSS) chi hrang hrang hmanga Serchhip District chhunga hnathawhte thlirho niin Scheme changtu Department hrang hrang te'n an hmalak dan report an pe a, zawhna leh chhanna hunte hman niin hmalak zel dan turte rel a ni a; Non-Official Member (khawtlang aiawh) te pawhin zawhnate zawtin, khawtlang harsatnate an thlen bawk a, a chin fel dan turte sawi ho a ni bawk.
Lok Sabha MP hian nimin vek khan Ser-chhip District chhunga Centrally Sponsored Scheme (CSS) kaltlanga hmalakna hrang hrangte a tlawh nghal a, he hunah hian Line Department hotu ten an tawiawm a ni.