Internet kaltlanga inbumna ah kumin chhungin Police ten cheng vbc.1.06 chuang an pekir tawh
Tunhnaiah thuchhuah an siamah Mizoram Police chuan Cyber Crime dona kawnga chak zawka hmalak a nih theih nan kumin July 27 khan State Cyber Crime Coordination Centre (S4C) chu Mizoram Police hnuaia Unit hran angin Mizoram sawrkar chuan a din thu leh S4C hi Cyber Crime dona kawnga hmalak ngai hrang hrang: chhuina, zirchianna, mipui zirtirna, Social Media vil hna leh Emergency-a chet vat dan te buaipui tura ruahman a ni tih an tarlang a. He hmalakna hnuaiah hian Cyber Crime avanga pawisa thila bumna tawk ten an pawisa chan hmuhlet leh theihna turin portal, Money Restoration Module chu siam a nih thu leh Cyber Crime victim ten an complaint kaihhnawiha an pawisa Bank-a la tangkhang te lakkir leh theihna tur a nih thu an tarlang a. Kumin 2026 chhung hian Rs. 1,06,44,416/- zet chu Cyber Crime tuarte hnenah pekkir leh a nih thu leh hei hi Money Restoration Module (MRM) leh danin a phal anga hmalakna dangte kaltlanga tih a nih thu an tarlang a ni.
Hei bakah hian Mizoram Police chuan Social Media-a zahmawh rawngkai leh dan kalh thil post chungchanga thubuai lutah rang takin hma a la nghal vat thin tih pawh tarlangin, heng thubuai bawhzuina avang hian dan kalh online content URL tam tak chu paih bo (takedown) a ni tawh tih an tarlang a. Online inbumna a inhnamhnawih si lova, dik lo taka Bank Account block emaw, sum hrensak avanga harsatna awm thei chinfelna emaw atan Portal, Grievance Redressal Mechanism chu siam a nih thu pawh tarlangin, “Kumin chhung hian hetiang harsatna ang chi 28 lai chu hun khawhral lovin chinfel a ni tawh,” an ti.
Heng bakah hian kumin chhung hian State chhung hmun hrang hrang atangin Cyber Crime Police Station ten Cyber Criminal mi 9 an man tawh tih pawh tarlangin, “Mizoram Police chuan Cyber Crime chhuina kawngah State dang Police te nen thawhhona tha tak an nei chhunzawm zel bawk,” an ti a. “Mizoram Police hian Cyber Crime laka invenna chungchang zirtirna hi a kalpui reng a, kumin chhung ringawt pawh hian a bikin School leh College zirlaite hnenah zirtirna programme vawi 89 kalpui tawhin zirlai 9000 chuangin he zirtirna programme hi an chhim tawh a ni,” an ti a. “Online-a pawisa kaihhnawih bumna emaw, cyber crime i tawk a nih chuan, rang takin Cyber Crime Helpline - 1930 (24x7 a biak theih reng) ah emaw, National Cyber Crime Reporting Portal (cybercrime.gov.in) ah report nghal tur a ni. I pawisa kha hmuh kir leh theih a nih chuan SMS alert i dawng anga, Money Restoration Module (mrm-ncrp.mha.gov.in/) kaltlangin i pawisa i dil let thei ang. Tanpuina i mamawh chuan Cyber Crime Police Station, 3rd Floor, SP Aizawl Office Building, Treasury Square, Aizawl pawh pan theih reng a ni,” an ti bawk.