Chhiarpui neih meka mipui zat chhiar turah raltlan te pawh chhiar vek an ni dawn
Secretariat Conference Hall-II, MINECO-a Census 2027 Phase-II kalpui dan tur inhrihhriatna leh sawihona hun One Day State Level Conference on Census hi Chief Secretary, Khilli Ram Meena chuan kaihruaiin Inchhiarpui atanga data lakkhawmte chu India ramin policy hrang hrang, a bikin Vikshit Bharat 2047 tih hlawhtlin kawnga a hman tangkai turte an nih dawn avangin uluk leh felfai thei anga bera kalpui a tul thu a sawi a. Census laimu ber pakhat, mipui awmzat inchhiarna chu Phase-II ah hian neih a nih tawh dawn avangin Phase-I aiin thawhrim lehzual a ngai dawn tih sawiin, District leh Field Level Officer-te chu an mamawhna kawngah puih an inhuam reng thu sawiin, theihtawp chhuah a, Phase-I ang bawkin Phase-II ah hian Mizoram chu State zofel hmasa ber nih tum leh turin a chah a ni.
Kum 2027 Chhiarpui-ah hian India ramah vawi khatna atana Online hmanga mahni inziahluh theihna, Self-Enumeration via Digital Mode chu kalpui niin Phase-I a House Listing and Housing Census (HLO) ang bawkin Phase-II kalpui tur, Population Enumeration-ah hian Self Enumeration hi kalpui a ni ve leh dawn a. Ruahman danin Self Enumeration hi January ni 10, 2027 atanga January ni 24, 2027, ni 15 chhunga neih tur niin House to House Enumeration hi January ni 25, 2027 atanga February ni 28, 2027 chhunga neih tur a ni a, March ni 1, 2027 atanga March ni 5, 2027 chhungin ennawnna (Revision Round) neih tur a ni bawk ang.
Tun tumah hian a vawikhatna atan Caste Census neih tur niin Mizorama Scheduled Caste 16 (sawm leh paruk) awmte chu an zat chhinchhiah an ni anga, Raltlan (Refugees) te pawh chhiar tel vek tur niin Chhiarpui-a chhiar an nih avang hian India khua leh tui nihna an nei tihna erawh a ni lo thung a. Census-ah hian Adhaar Card number share duh lo an awm chuan tihluih tur an nih loh tur thu tarlan niin Special Intensive Revision (SIR) 2026-a engemaw vanga tel lo te pawh Census-ah chuan chhiar tel vek an nih tur thu tarlan a ni bawk.
Census Data lakhawmtu turte mawh-phurhna leh training pawimawhna te pawh he hunah hian tarlan niin Master Trainers, Field Trainers leh Enumerator & Supervisors te training chu kumin November thla chhunga zawhfel hman tura ruahman a ni a, Enumerator pakhatin mi 800 vel bawr theuh an ziahluh theihna turin rua-hmanna siam a ni bawk a. Census 2027 Phase-II kalpuina tur atan hian Sawrkar Laipui chuan Mizoram tan cheng vbc. 19.19 a dah a ni.
Chhiarpui (Census 2027) Phase-II kalpui dan tur inhrihhriatna leh sawihona hunah hian Director of Census Operations Vinod P Kavle chuan inlawmna thu sawiin, Jamil R. Swer, Deputy Director, Census Operations chuan Census 2027 Phase-II kalpui dan tur leh training neih dan turte a sawi a; GAD changtu Principal Secretary Sudhir Kumar chuan kalkhawmte hnenah hriattur tul bakah fuihna thuchah a sawi a ni.
He hunah hian Secretary, Land Revenue & Settlement Department; Special Secretary, GAD (Additional State Nodal Officer for Census); District tina Principal Census Officer; Joint Secretary, GAD (Joint State Nodal Officer for Census); Director, Directorate of Information & Public Relations; Deputy Secretary(G), GAD (Deputy State Nodal Officer for Census) leh Under Secretary (G), GAD (Assistant State Nodal Officer for Census) te an tel a ni.