Chawimawina dawngtu lawmpuina hun buatsaih
Horticulture Minister Pisa-a ZT Lalrithangi chawimawina hunah hian Horticulture Minister C. Lalsawivunga chuan khawvel pum huap pawha Mizote theuneu loh zia tihlan a ni leh ta chu lawmawm a tih thu sawiin, Mizo nu, mahni tuina kawnga theihtawp chhuaha khawvel pum huap chawimawina hial dawng thei a nei chu Mizoram pawhin a chhuang hle tih a sawi a, Mizo hmeichhiate tan entawn tur tha tak a nih ngei a beisei tih a sawi bawk.
Nimin-a lawmpuina thilpek hlan tak ZT Lalrithangi (38) w/o F. Zabiakliana, Sangau (Lawngtlai District) hi thiamna lamah M.A (Sociology) a ni a. A pasal leh an fate 3 nen chhungkuain Sangau-ah an khawsa mek a. District dangah Strawberry tha taka an tharchhuahte a hmuhin, Lawngtlai lamah hmalak ve a duh a, a sum khawlin Strawberry runners 1000 leiin bul a tan a, a enkawl dan leh thil dangah Horticulture Department lam rawnin Horticulture Department mai bakah, KVK, ATMA leh Agriculture Department-te chuan Lalrithangi hi theihtawp chhuahpuiin, Polythene mulch-te, Drip Irrigation System- te leh Water Harvesting tanky-te an siamsak a. Mizoram Horticulture Fair, June, 2026-a neihah khan Lawngtlai District Best Farmer atan pawh thlan a lo ni tawh a ni.
'FAO 100 Women Heroes in Agrifood Systems and Rural Development' chawimawina dawng tur hian Khawvel puma ram 131 atangin nomination 600 chuang lutin, India ram atang pawhin nomination 20 vel a lut bawk a. Heng zawng zawng zingah hian khawvel puma Hmeichhia, an thawhrimna leh inpeknate chhuan lo la awm turte tana entawn tlak nia ngaih, UN-FAO-in a thlanchhuah takte zingah India atangin ZT. Lalrithangi leh Priyanka Mahesh Shelke, Maharashtra a mite chu an tel ta a ni.