Agriculture Minister leh Bialtu MLA hovin 'Sailulak Day’ vawi 126-na hman a ni
Mizo lal huaisen leh a mi leh sa te Sap laka humtu Zakapa hming chawia sak, Zakapa Hall-a Sailulak Day 2026 lawmnaah hian Khuallian nia hmanpuitu Agriculture Minister PC. Vanlalruata chuan Sailulak khua in Day an ngaihtuahchhuahna leh a taka an hlut tih hmuhin in awhawm a tih thu sawiin, “Khawtlang inlungrual lo tâna tih theih a ni lo a, lal huaisen leh rinawm lal ropui Zakapa khua in nih angin kha ropuina kha in la nunpui zel niin a lang,” a ti a. “Damlo tanpui ngai, harsa tak tak khawchhuak ten khawpui lamah an lo tuamhlawm thin a, a ropuiin a Pathian thu a ni,” tiin khawchhuak te inpuih thinna chu thil entawntlâk a nih thu leh a ropui thu a sawi a. “Midang tâna kan tha leh zung kan hman hi a thlawn dawn lo, tan lo la zêl ula, Sawrkar atangin hmasawnna hi a khairual a ngai a, harsa bîk lutuk khaichhuak tura ke pen turin rawngbawlna zau zawk in hawn theuh ka duh a ni,” a ti bawk.
Agriculture Minister chuan sawrkar hmalakna te tarlangin, Tung chin beihpui thlak thar a nih tur thu a sawi a. India-in Tung hriak a mamawhna a nasa em em a, chutih laiin a thar mumal loh avangin Delhi leh Mumbai te chu China atangte a Tung hriak lalut hnemtu an nih thu a sawi a. Agriculture Department lamin nasa taka hma an lâk thar avangin Tung ching thar hi kum khat ah mi 5,000 chuang an awm tawh thu sawiin, Tung ching duh tan a chi pawh sawrkarin a ngaihtuah thu a sawi bawk a ni.
He hunah hian Bialtu MLA, Lalmuanpuia Punte chuan a Bial mipuite chu hun hlimawm tak hmang tura duhsakna hlanin Mizo lal zinga Sap laka tlawm ve lo Sailulak lal Zakapa a ngaihsan thu a sawi a, a Thlan chu duh anga cheihnûm a nih loh avangin chei that a ngaih thu a sawi bawk.
Nimin-a Sailulak Day puala Vantlang Inkhawm hi Jessy Rammawizuala chuan kaihruaiin Sailulak VCP, K. Vanlalrema chuan inlawmna thu a sawi a, Mizoram State Legal Services Authority atangin thusawi ngaihthlak a nih bakah Nunna pathum chhanhimtu Sailulak khaw chhuak KVL. Siamkima hnenah chawimawina hlan a ni a. Aizawl-a Sailulak Welfare atangin thusawi ngaihthlak a nih bakah chawimawina hun te hman a ni bawk.