Lawngtlai District Sangau khuaa Strawberry hlawhtling taka chingtu ZT. Lalrithangi chu United Nations peng, Food and Agriculture Organization (FAO)-in ‘100 Women Heroes in Agrifood Systems and Rural Development’ Award dawng tur a thlanchhuah zingah telin Mizo zingah hetiang Award dawng hmasa ber tur a ni a. Ram hrang hrang 131 atanga nomination 600 chuang thlankhawm zingah India ram atangin mi pahnih thlan an ni a. Lalrithangi hi India atanga thlanchhuah zinga mi pakhat niin, October 12-16, 2026 chhunga Rome, Italy-a FAO Headquarters-ah neih tur World Food Forum Event-ah Award dawng turin sawm a. Horti Fair, Mizoram 2026-ah Lawngtlai District atangin ‘Best Farmer’ atan thlan a ni tawh a ni.
FAO chuan Lalrithangi hi Strawberry chin kawngah taima takin hma a la tih sawiin, a inpekna, phurna, thawhrimna leh chhuan awmzel tur tan entawntlak taka a thawhna avangin agriculture leh Rural Development lama chawimawi tur hmeichhe 100 zingah thlan a nih thu an sawi a ni.
