Serchhip District-a HIV/AIDS a hmalak dan tur rel
Nimin khan Serchhip DC Meeting Hall-ah Serchhip District AIDS Prevention and Control Committee chu an Chairman leh Bawrhsap, Paul L. Khuma hova thukhawmin he huna tarlan a nih danin National AIDS Control Organisation, Ministry of Health & Family Welfare, Govt. of India-in Projected Population atanga District tinte tana target a duan chu thlirho a nih bakah 95%-95%-99% target-a Serchhip District dinhmunte thlirho a ni a, tun dinhmun (July report)-ah Serchhip District chu 77%-95%-96% a ni mek a. Hemi awmzia chu target population atanga 95% ten an dinhmun an inhriat a, chungzinga 95% ten ART treatment an dawn a, 99% ten inenkawlna hmanga taksaa HIV hrikte an thunun tihna a ni.
Nimin-a thutkhawm ah hian Serchhip District-in 95%-95%-99% target a tih hlawhtlin theih nan HIV test leh fimkhur tura inzirtirna tur atana thingtlang khaw thlan bik (selected village) neih dan tur te, Mobile Van leh Damdawi In OPD-ah te a chak zawka test tih theih dan tur te, HIV/AIDS darh zel tur ven nan leh mumal zawka hmalak a nih theih nan, data mumal neih a mahni dinhmun inhriatchian leh khawtlang hruaitute nena thawhho dan tur hrang hrangte sawiho niin sawrkar Office hrang hrang leh School naupangte hnenahte uar lehzuala Awareness/Sensitization Programme kalpui dan turte rel a ni.
He thutkhawm ah hian Serchhip District Sr. Chief Medical Officer Dr. Lallawmpuii, Dy. CMO Dr. Lallawmkimi Chhakchhuak, District Medical Superintendent Dr. ZD Lalmuanawma, ICTC hotute leh sawrkar mi pawimawh dangte an tel a. Bawrhsap chuan thawktute chu an hma-lakna ah theihtawp chhuah zel turin a fuih nghal bawk a ni.