Mi pahnih hnenah 'Red Card' pek a ni tawh

Excise & Narcotics Department-in hriselna kaihhnawih avanga Zu kawl leh in phalna a siam, 'Red Card' chu mi pahnih hnenah pek a ni tawh a, hetihlai hian Zu hralhchhuah a la ni lo thung.
Akashvani News Aizawl zawhna chhangin, Excise & Narcotics Department a thawkte chuan Red Card dilna Form hi June ni 3, 2026 atang khan Rs. 50-in pekchhuah tan a ni a, nimin thlengin Mizoram pumah mi 110 hnenah dilan Form hi pekchhuah a ni tawh a, Commissionerate of Excise & Narcotics, Aizawl atangin mi 101 te hnenah dilna Form hi pekchhuah tawh niin Lunglei-a Excise & Narcotics Department Office atangin mi 3, Kolasib leh Mamit atangin mi 2 ve ve leh Lawngtlai leh Saitual atangin mi pakhat ve ve hnenah te pek a ni tawh bawk a ni.

Red Card hi Doctor te'n damdawi atana an chawhna lehkha an neih hnuah an awmna District Medical Superintendent (DMS) ten an chawh nachhante enfiahin, phalna an pekte hnenah chauh pek theih a ni a. Tun dinhmunah mi pahnih in Red Card Fee Rs. 5000 an pe tawh a, Red Card hmanga IMFL hralhchhuak tur hian engkim peihfel tawh ni mah se tun thlengin Red Card hmanga Zu lei tura kal an la awm lo thung tih an sawi a ni.

Tarlan tawh angin, Red Card hi kum khatah Rs. 5,000 man zel a ni dawn a, Aizawl-a Excise & Narcotics Department Pisa-ah END chuan Departmental Store siamin, Zu an man, Court-in a tihfel tawhte chu Red Card neite tana hralh chhuah a ni dawn a. Zu chu a man pangngai aia zaa 75-a tlawmin hralh a ni dawn a ni.