Sawrkar hnathawk kum dik lo a ziak, pension hun dik a chhuak pung zel

Mizoram-ah sawrkar hnathawk, pian kum dik lo a inziak, an pension hun (kum 60) a thlena Voluntary pension-a chhuak mi za chuang chhinchhiah an awm tawh a. Hemi chungchang inzirtirna hi a theih ang anga kalpui a nih avangin kum dik taka pension tum mi engemaw zat an awm mek nia thudawn a ni.

Sawrkar hnathawk kalphung hrang hrang zirchianga lehkhabu pawh eng emaw zat lo chhuah tawh, Accounts & Treasury-a thawk, Ellis H. Pachuau chhinchhiah danin a hun laia kum dik loa inziak/ziahsak, kum dik taka pension-a chhuak hi kum 2010 chin vel atangin chhinchhiah a ni a, tun thlengin mi 108 an tling tawh a. Chhinchhiah china kum bawhchhiat duh lova an kum dik taka pension-a chhuakte hi mipa 67 leh hmeichhia 41 an ni a, kum dik-a pension-a chhuak mi 108 zingah hian Kohhran Upa pawh 21 an tel nia thudawn a ni bawk.

Ellis H. Pachuau hian a theih ang angin hetianga kum dik taka pension-a chhuakte hi a chhinchhiah thin a, a hnena in-report pawh an awm thin a. Kum dik taka pension-a chhuakte avang hian sawrkarin sum tam tak a hum phah thei tih thudawnna chuan sawiin, kum dik taka pension-te vangin an hnuaia mite an kaisan theih phah rualin kum dik lo avangin kum dik taka ti te kaisanna hun a awm loh phah thei bawk a ni.

Tun dinhmunah Mizoram sawrkar hnathawk nawlpuite pension hun chu kum 60-ah bithliah a ni a, hei hi zawma a hun taka pension-a chhuak tura inzirtirna sawrkar hnathawkte zingah a theih ang angin kalpui a ni a. Hei hian rah tha a chhuah mek zel nia thudawn niin kum dik lo inziak, an pension hun a thlena pension-a chhuah ngei tum sawrkar hnathawk zingah engemaw zat an awm mek nia thudawn a ni bawk.

Hetihlai hian Mizoram-a sawrkar hnathawk inzawmkhawmna pawl lian ber, Federation of Mizoram Government Employess & Workers (FMGE&W) chuan Mizoram sawrkarah pension hun kum 62-a pawhsei an lo dil/ngen tawh thin a, a hlawhtlinnna erawh tun thlengin a la awm lo a. Hemi chungchanga sawrkar-a an thu thlen chu ‘phutna’ ni lovin ‘dilna’ a nih thu leh a hlawhtlinna hmuh an beisei thu te pawh an lo sawi tawh a ni.