Remsiami tan Arjuna Award
.jfif)
Sawrkar laipui-a Sports Ministry chuan kumin hian India rama Infiammi te chawimawina sang ber, Dhyan Chand Khel Ratna chu sem loh tura a ruahman hnuah Thla ruk chuang liamta a Selection Committee in rawtna an thehluh te an ennawn hnuah chawimawina sang ber dawttu, Arjuna Award dawng tur mi 17 a thlangchhuak a, heng zingah hian Mizo nula Lalremsiami chu telin ani bakah hian Hockey khel thiam atangin Rajkumar Pal chu thlan a ni bawk a. Arjuna Award hian pawisafai cheng nuai 15 a kengtel a ni.
Kumin hian Selection Committee chuan Arjuna Award dawng tur mi 24 hming an thehlut a, dawng awm tak tak ten an dawn theih nan leh Award hlutna vawnhim nan Sports Ministry chuan an ennawn leh a, mi 17 chauh an pawmpui ta a. Kumin hian Cricketer pakhat mah an tel lo a. Kum 2023-a Fast Bowler Mohammed Shami-an a dawn hnuah Cricket atangin Arjuna Award dawng an la awm leh lo a ni.
India rama infiammite tana chawimawina sang ber chu Major Dhyan Chand Khel Ratna Award dawt niin, a dawttu ‘Arjuna Award for outstanding performance in Sports and Games’ hi kum 4 kalta chhunga infiamnaa titha zualte hnenah hlan tura ruahman a ni.
Kum 26 mi Lalremsiami Hmar Zote hian India aiawhin Asian Games, Commonwealth Games, Asia Cup, Asian Champions Trophy, FIH Nations Cup leh Youth Olympic Games-ah te Hockey a lo khel tawh a. Kum 2018-a Indonesia khawpui Jakarta-a Asian Games neih tum khan India tan Hockey-ah Silver Medal la a, Mizoram atanga Asian Games-a Medal la hmasa ber a ni.
Arjuna Award dawng tura thlan Lalremsiami Hmar hi Chief Minister Lalduhoma leh Sports Minister Lalnghinglova Hmar te chuan an lawmpui thu leh an chhuan thu an sawi a ni.