PZP ten Vathuampui-a Airtel Tower an off sak

Pang Zirlai Pawl (PZP) chuan Lawngtlai District Vathuampui a Airtel Tower chu Pathianni khan an off sak a, hemi chungchang ah hian Lawngtlai Bawrhsap chuan hma a la mek a ni.

Pang Zirlai Pawl hruaitute chuan Vathuampui leh a chhehvel-a Airtel Signal chhe lutuk chu vawi engemaw zat Sawrkar leh Airtel thuneitute hnenah an thlen tawh tih an sawi a, awmzia a neihloh avangin Pathianni khan an President Albin Lalhruaitluanga hovin Airtel Tower hi an off a, ni thum chhungin Signal tha zawk pe turin thuneitute phutin, huntiam chhunga an beisei ang an hmu lo a nih chuan Vathuampui leh a chhehvel-a Airtel Tower pariat chu tihchhiat mai an hrehloh tur thu an sawi a ni.

He thil thleng ah hian Lawngtlai Bawrhsap Donny Lalruatsanga chuan Airtel thuneitute bepawpin, Vathuampui a harsatna awm chinfel dan tur a sawipui nghal a, Pang Zirlai Pawl te hian nimin khan thuchhuah siamin, Lawngtlai Bawrhsap hmalakna ngaichan hrih nise tiin Vawiin tlai lam thleng hian thuneitute hi an ngaichang dawn a ni.