PPP Mode-a School te enkawl dan tur duan fel a ni
Zirtawpni khan Mizoram Education Reforms Committee (MERC) thutkhawm vawi 17-na chu an Chairman leh School Education Minister Dr. Vanlalthlana hovin Directorate of School Education Committee Room-ah neih a ni a, he hunah hian Mizoram-a zirna siamthatna tur hmachhawp hrang hrang kalpui dan tur rel niin Sawrkar leh Kohhran thawhhona atanga School enkawl dan tur, Public Private Partnership (PPP) atana rawtna an pawm tawh tihhlawhtlin dan tur leh ruahmanna (Implementation Schedule) an duang a. An ruahman ang chuan September atanga November 2026 chhung hian Sawrkarin tih tur hrang hrangte tiin, December 2026-ah chuan School thlang fela Memorundum of Understanding (MOU) te tihfel tum nise an ti a. Kum 2027 Academic Session tan hunah PPP Mode School ten hna an tan ve theih nan School inhlanfelna (Hand over to Partner) February 2027-ah neih tum nise an ti.
Hei bakah hian hman theih tura pawm tawh, Draft Mizoram Education (Transfer and Posting of School Teachers ) Rules, 2026 chu siam that ngai nia langte siam that a ni a. Sawrkara dahluh hmain Service Association te leh helam kaihhnawih pawl hrang hrangte ngaihdan leh thlir dante enho leh nise an ti a. Chumi zawhah chuan sawrkarin Dan ang taka kalpui turin thil tulte a buatsaih anga, hun remchang hmasa berah Cabinet Agenda turin ruahman tum nise an ti bawk.
Heng bakah hian MERC Meeting vawk 17-na hian tunlaia Mizoram chhunga zirna lam hawi thil pawimawh tak tak te an sawiho a. Mizoram-ah zirna In hma a sawn mek chu lawmawm an ti a; Zirtirtute, Office hrang hranga thawktute leh kil hrang hranga zirna hmasawnna atana beitute theihtawp chhuah zel turin an ngen a ni.