Kawng siamin Lungpho Branch YMA an hnatlang

Inrinni khan Lungpho Branch YMA chuan an khaw panna kawng siam hnatlang ko in mi za chuang an thawkchhuak.
Serchhip District chhunga awm Lungpho Branch YMA hruaitute hnen atang LENKAWL in thu a dawn danin Lungpho khua in Fur laia bungraw chawkluhna atana an hman ber Kawlkulh atanga an khaw panna kawng hi Ngentiang thlengin PMGSY kawng niin kum 2024 August 24 khan Chawngthu Construction chuan kawng siam hna hi an thawk a. Kumin Fur-ah hian an khaw ram chhung hi kawngpui a chhiain lirthei tan tlan ngam a ni meuh tawh lo a. Hei vang hian harsatna nasa tak tawkin Lungpho VC leh Road Monitoring Committee lam ten chak zawka hma la tura Contractor lam an ngen hnuah leh PWD lam pawh an biak hnuah hmalakna hmuh tur a awm mumal loh avangin hetiang hian hnatlang ko in kawng siam hna hi an thawk ta tih an sawi a. He hnatlang ah hian mi 120 atanga 150 vel thawkchhuakin Bolero Pik-up 7, SK Tipper pakhat leh JCB pakhat thawkchhuakin an khaw ramchhunga lirthei tana kal hrehawm zual kawng siamthat hna hi an thawk a, kawng khuar te hnawhin tuihawk tling te pawh an tifai nghal bawk a ni.

Lungpho Branch YMA hruaitute chuan he kawng siam mek hi kumin December thlaa thawh zawh tur nia an hriat thu sawiin, amaherawh chu tuna kawng dinhmun leh an thawh dan en chuan zawhfel hman a rinawm loh thu an sawi bawk.