Petrol leh Diesel Cess atangin PWD in sum hmu lo

PWD Minister Vanlalhlana’n kawngpui siamna atana Petrol leh Diesel cess lak atangin kum 2025-2026 inkarah Finance Department atangin PWD-in sum hmuh a nei lo niin a sawi.

Assembly Fur thutkhawm zawhfel taka zawhna ziaka a chhanna ah PWD Minister chuan Finance Department atangin PWD in kum 2025-2026 inkarah sum hmuh a nei lo tih tarlangin, District-ah pawh hmalakna a awm lo niin a tarlang a. Hetihlai hian Finance Department changtu Chief Minister Lalduhoma chuan sawrkarin Social Infrastructure & Services Cess leh Road Maintenance Cess lak a nih atanga kumin July thlenga sum hmuh tawh zat chu Rs. 1,68,31,20,534 a nih tarlangin, Petrol leh Diesel atanga Cess hi litre 1 zelah Social Infrastructure and Services Cess atan Rs. 2 leh Road Maintenance Cess atan Rs. 2 lak a ni a, tuialhthei chhiah chu kum 2024 September ni 3 atanga lak a ni. Chief Minister chuan tuialhthei chhiah chu kawngpui siam nan kum 2025 – 2026 inkarah cheng nuai 1500 pekchhuah a ni tih sawiin, kum 2026 atanga kum 2027 inkarah cheng nuai ?4325 pekchhuah niin kawng siamna atan cheng nuai 5825 pekchhuah tawh a ni, a ti bawk.

PWD Minister Vanlalhlana chuan National Highway kawngpuiin Aspirational District zawng zawng a pawh kim tawh tih pawh zawhna ziaka a chhanna ah a tarlang a. Mizoram PWD hnuaia kawng thar siam a awm loh thu leh National Highway kawngpuiin Aspirational District zawng zawng a pawh kim tawh thu a tarlang a. Mizoram pumpui ah MPWD enkawl kawng km 6614.81 a awm thu pawh tarlangin, Sawrkarin kum 2024-25 ah Seal Coating leh Re-surfacing km 464.55 leh kum 2025-26 ah km 534.27 a ti tawh tih a tarlang a, kum 2024-25 ah cheng nuai 6997 sen niin kum 2025-26 ah cheng nuai 6801 senral a nih thu a rarlang bawk.