Mizoram State Song-a 'Ro Min Relsak Ang Che' tih puanna tur Official Resolution pawm a ni
Nimin-a Mizoram Legislative Assembly thutkhawm ah Chief Minister Lalduhoma chuan 'Ro Min Relsak Ang Che' tih hla Mizoram State Song atana puang turin Official Resolution a pulut a, India ram Danpui in ‘State Song’ neih hi a khap lem lo tih Chief Minister chuan sawiin, State 14 vel te chuan an nei tawh nia an hriat thu a sawi a. Kan National Anthem leh National Anthem te nena inkalh zawnga State Song lo neih erawh a remchang lo tih sawiin, “August 10, 2026-a Cabinet Meeting chuan State Song neih ve ngei hi tul a ti a, State Song atan chuan Pu Rokunga phuah, ‘Ro min rel sak ang che’ tih hla chu lungrual takin a pawm ta a ni,” a ti a. “He hla hian Pathian chu Hnam tin chunga roreltu leh Kulhpui nghet, lalber te Lalber a nih zia a puangchhuak a, kan ram leh Hnam min hruaia min humhima ro min rel sak tura tawngtaina hla a ni,” a ti bawk.
Chief Minister chuan he hla hi Official a sak a nih apiangin ding chungin, kutphah dinglam Lung zawn-a dahin rilru tawngtai nena sa thin turin an in ngen nghal bawk tih a sawi a, “Ram rorelna a Pathian ram tundin a nih zel theihna tura min fuihtu leh hun khirh leh harsa paltlang thei tura rinna leh chakna min petu lo ni mawlh rawh se,” a ti bawk.
He Official Resolution sawihona ah hian Member thahnem takin thu sawiin, Resolution thlawp lo zawnga sawi an awm lo a, Speaker kaihhruaina hnuaiah lungrual taka pawm niin sawrkar chuan Guideline eng eng emaw ala siam tur thu Chief Minister chuan a sawi bawk a ni.