MZP Hqrs. Serchhip ten zirlai titha an chawimawi
Sub-Hqrs. YMA Hall, Serchhip-a zirlaite tithate chawimawina hun hi Serchhip Bawrhsap Paul L. Khuma chuan hmanpuiin hetiang hun buatsaihtu MZP te chungah lawmthu a sawi a. Zirlaite fuihna thu sawiin hlawh-tlinna chang tura thil pawimawh pathum, heng - mahni inthunun theihna te, tumruhna leh hmathlir fel tak neihna te chu eng lai pawha an thinlunga vawng reng turin a chah a, hlawhtlinna kawng hi kawng awlsam a ni lo tih hre reng a, beidawng lova theih-tawp chhuah zel turin a fuih a ni.
He hunah hian MZP General Hqrs. President Dr. C. Lalremruata pawhin raltlan zingah kum khat lek chhunga Mizo tawng zir chawpa Subject zawng zawnga Letter hmu thei an awm thu sawiin, Mizo naupangten kan tum tak chuan kan ti ve thei tih hre turin zirlaite chu a fuih bawk.
MZP in nimin-a Zirlai titha chawimawina hun an buatsaih ah hian Serchhip atanga HSLC Distinction a pass mi 22 leh HSSLC Distinction a pass mi 4 te bakah zirlai Exam zawng zawng pass vek na School – Marian High School, Presbyterian English School, Zoluti Memorial High School, Brilliant Higher Secondary School (Art Stream) leh New Serchhip Secondary School-te bakah MPSC Combined Civil Services exam 2025-a Serchhip atanga MCS-a tling Lalruatfela s/o Rohmingliana, Serchhip Bazar Veng te hnenah chawimawina hlan an ni.