MGYA Golden Jubilee lawmna Chief Minister in hmanpui
MGYA Golden Jubilee lawmna ah hian Chief Minister Lalduhoma chuan Mizoram-a Gorkha thalaite kaihruaitu pawl chak tak MGYA kan nei chu vanneihthlak a tih thu leh Mizoram-a Gorkha thalaite kaihruaitu tha ber a nih thu a sawi a. “Gorkhate hi hnam huaisen, tlawmngai, themthiam bawk si in nih avangin British sawrkar khan an duh em em che u a. Mizoram a British an lo luh pawh khan an kutke pawimawh ber zinga mi in ni. Tlang mi ve tho in lo nih avang leh Mizote ang bawka hnam tlawmngai leh nunnem tak in lo nih avangin kan pi leh pute pawh khan an ngaina em em che u a, chengho tura khuanu siamsa ang maiin kan inngeih zui ta a. Vawiin thlengin kan inkarah innghirnghona a la awm ngai lo a ni. In hnen atangin kan nu leh pa te khan thil tam tak an zir a, nangni pawhin Mizote hnen atangin nunphung tha tam tak in la chhawng a ni,” a ti a. “Kum 1966-a ram a lo buai khan Gorkha thalai engemaw zat Mizoram tan an rammu a. ‘Dam leh tlang khatah, thih leh ruam khatah’ tiin kan lo tuarin kan beiho a. Mizoram Gorkha unaute thusawi, thinlunga cham reng thin chu ‘Mizoram bak lu nghahna hmun kan nei lo’ tih hi a ni,” a ti.
Ram rorelnaah pawh District Council hunlai khan Gorkha engemaw zat VC Nominated Member-ah an awm thu leh UT kan han nih khan Kapurchand Thakuri chu Nominated MLA atan dah a ni bawk tih Chief Minister chuan a sawi a, “Kan sawrkar hian minority-te hmakhua kan ngai em em a, an tana thil tha kan tih theih chi hi chu kan ti zel dawn a, thlamuang takin awm ula kan duh,” a ti bawk.
MGYA Golden Jubilee lawmna hun hi Pratap Chhetri chuan kaihruaiin, MGYA Central President Mahesh Rai chuan kalkhawmte lawmna thu a sawi bakah Central YMA President, R. Lalngheta pawhin thu a sawi a. Chhingchhip Sainik School Cadet zinga National Defence Academy & Naval Academy Exam-ah tling thei hmasa ber Agastya Thapa hnenah lawmpuina thuziak an hlan bawk a ni.
Mizoram-a Gorkhate hi British lo luh rual khan an lo lut ve nghal a, an pension hnuah an rama kir tawh lovin Mizoram-ah an khawsa zui zel a, a hunlai khan sawrkar pawhin an chenna tur hmunte a ruahman sak a, an hnam dan anga an inenkawlna turte pawh a siamsak a. Kum 1950 chhiarpui-ah khan Aizawl District-ah mi 2557 awmin tunah hian mi 8000 vel an awm mek a. Mizoram Gorkha Youth Association hi August ni 18, 1976 khan Aizawl Khatla Veng-a Gorkha thalaiten bul tanin an din a, Mizoram pum huapin kum 1976-ah a kal tan a, Branch 17 an nei mek a ni.