Kawng chhia avanga harsatna sutkian nan a tul dan a zira hma la turin Legal Team din a ni
Serchhip District chhunga National Highway-54 tia hriat thin, National Highway-02 tih tak siam mek chungchang ah Serchhip Bawrhsap Paul L. Khuma hian nimin khan Serchhip DC Meeting Hall-ah thuthar thehdarhtute kawmin Serchhip District in kawngpui tha leh tlo an neih theihna tura theihtawp an chhuah mek thu leh hmalakna kalpui mek zel a nih thu te a sawi a. Serchhip District-a he kawng siam mekah hian Package pathum bakah By-Pass Road pahnih awmin heng te hi NHIDCL hnuaiah Contractor pathum ten thawkin Package-I ah hmar lama Serchhip District chin Phulmawi atanga Baktawng Mualkawi thleng chu Shivalaya Construction Ltd. ten thawkin May 25, 2024-ah zawhfel a nih thu a sawi a. Package-II Baktawng Mualkawi atanga Keitum thleng leh Chhiahtlang leh Serchhip by-pass road te chu KRAM Infracon Pvt. Ltd. ten thawkin kum 2024 March thla ah zawhgel a nih thu a sawi a. Package-III chuan Keitum atanga Bungtlang thleng huamin Bhartia Infra Projects Ltd. (BIPL) ten thawkin April 30, 2025 khan zofelin heng Contractor te hian an hna an zawh atanga chhiara kum li (4) chhung chu Defect Liability Period (DLP) niin kawng hi an enkawl zui tur thu a sawi a ni.
Bawrhsap chuan heng kawng te hi uluk taka vilzui reng a nih thu sawiin, sawrkar kum liamta atanga tun thlengin Monitoring leh Inspection bakah kawng chungchanga thutkhawm te a vaiin vawi 12 lai neih a nih tawh thu leh an hmalak thin dan tlangpui tarlangin, “Kawng siamtha tur hian huntiam pek thin a ni a, mahse kan bawhpelh chho zel,” a ti a. Serchhip District in kawngpui tha leh tlo an neih theihna tura theihtawp an chhuah zel tur thu leh a tul dan a zira Legal Action la thei turin Legal Team din a nih thu te, KRAM Infracon Pvt. Ltd. chungah chauh lo pawh anmahni ruaitu NHIDCL lakah pawh Legal Action hi a tul chuan lak a nih tur thu a sawi bawk.
Contractor-te kawng siam dan leh an enkawl zui zel dante uluk taka vil reng a nih thu Bawrhsap chuan sawiin, Serchhip-a chanchinbu mite, YMA leh Joint VC ten an tawiawmna ah lawmthu a sawi a. MJA te hmalakna avanga kawng chungchang in Ministry beng hial a thleng thei leh Mizoram-a NHIDCL hotupa ber Executive Director, Adelbert Susngi pawh Serchhip-ah rawn kala he huna a tel thei chu lawmawm a tih thu a sawi a ni.
Tun dinhmunah he kawngpui dinhmun an enfiahna atangin Package-I leh III chu a that thawkhat thu Bawrhsap chuan sawiin, Package-II, KRAM Infracon Pvt. Ltd. te hnathawh erawh a chhiat thu a sawi a; kawng siam uluk loh hi mipuite chunga pawisawina Public Nuisance a nih thu leh Defect Liability Period tlem la awmah theihtawpa vila, quality tha thei ang bera hma la turin a hrilh nawn leh a; District mipuite pawh thahnemngai taka kawng siam leh thawmthat hnate vil pui turin a sawm a. Thuneitute hnena ziaka an thlen thei lo a nih pawhin ‘Vantlang Viltu’ hmanga thlen thin tur leh bawhzui a nih tur thu a sawi bawk a ni.
He hunah hian NHIDCL hotupa, Executive Director Adelbert Susngi pawhin Ministry beng hial a thlen tawh avangin Contractor KRAM Infracon te chu tha taka hna thawk turin a hrilh a, Contractor ten an intiam angin August ni 20, 2026 chhungin kawng khuar chhelai an hnawh zawh atanga ni 7 chhungin By-Pass Road chhelai te pawh a tul anga PCC/Cement-a chhung tura tih an nih thu a sawi bawk a ni.