India leh Mizo mipui ten Remna Thuthlung kan siam; Hei hi India Danpui Constitution-ah ziahluh a ni - Tawnluia
MNF party in nimin-a Mizo Hnam Run Chhung Inkhawm an neih ah Deputy Chief Minister hlui leh MNF NCC nilai Tawnluia chuan kar kalta khan Chief Minister in Remna thuthlung chungchangah thil mak a sawi tih sawiin, “Mipui leh Remna thuthlung ziah kha kan Chief Minister hian a tibawrhbang a ni. Kan CM in MNF leh India sorkar inremna (Accord) anga a sawi hi thu dik lo a ni,” a ti a. “He thil hi kan la serious riau a, Remna kha Mizoram mipuite siam a ni a. India Constitution Article 371 (G) a thun turin inremna thuthlung-ah khan ziah a ni a, Constitution-ah sengluh niin MNF te chauh khan ziak ni ila engtin nge kan hman theih ang?” a ti a. ILP chungchang pawh sawiin, “Remna Thuthlung a ziah a nih angin keini chuan thlahdul kan phal ngai dawn lo. Kan CM erawh chuan ‘Central sawrkar thuneihna a ni’ tiin a tlanchhe nghal dui mai a, keini chuan State sawrkar min rawn a ngaih dawn avangin kan phal ngai dawn lo a ni,” a ti bawk.
Sawrkar hmasa in a kalpui, Parking House Support Scheme (PAHOSS) chungchang pawh sawiin Tawnluia chuan, “Feb. 6, 2009-ah kan din a, lirthei 423 dah theihna cheng nuai 159 sengin kan sa a ti. PAHOSS atan cheng nuai 7002 budget-ah nuai 6139 sanction a ni a, nuai 1152 kan hmang a. Covid avangin chet theih a ni ta lova; nuai 4900 kan hman bang chu K. Deposit ah dah a ni,” tiin PAHOSS-ah eirukna pakhat mah a awm loh thu leh Court-ah thiamlohna tur an nei lo tih a sawi bawk.
FCRA Bill chungchangah Kohhran hruaitute leh sawrkar hotute inhmuin, sawrkar hmalakna hmuh tur a awm lo niin a sawi bawk a, “Kristian sakhua sawinghing in a awm mek a, khawnge sawrkar a awm?” tiin Mizoram in tuna a mamawh ber chu rinawmna leh dikna a nih thu a sawi bawk.