Indane Xtralite NOW FTC Gas cylinder tlangzarh a ni
State Guest House-a hemi puala hun hmanah Supply Minister B. Lalchhanzova chuan IOCL ten englai pawha lei theih tura Indane Extralite NOW FTC gas cylinder an chhawp-chhuak ta chu lawmawm a tih thu a sawi a. Eirawngbawlna gas indaihloh avanga dan loa (black) gas lei thin chu hei hian a tihziawm a beisei thu sawiin, Indane Extralite NOW FTC gas cylinder chu Mizoram sawrkar hnuaia subsidy anga pek tur a nih loh avangin a man pawh a leitute mamawh ang zel (market-based) a nih tur thu a sawi bawk.
He hmalakna avang hian Mizoram-in IOCL atanga Gas cylinder an hmuh zat chu a tlem phah dawn loh thu Minister huan sawiin, Mual-khang Gas Bottling Plant chu hman theih tura hmalak mek zel a nih thu leh ni khatah Gas bur sang riat vel siamchhuah theih tura ruahman a ni tih a sawi bawk.
Nimin-a tlangzarh tak ‘Indane Xtralite NOW FTC Gas cylinder’ hi hman awlsam leh nuam zawk tura siam a ni a, gas cylinder pangngai aiin a zan zawk bakah a chhung langtlang thei tura siam a nih avangin gas tui awm zat a hmuh theih dawn a, hei vang hian refill hun tur pawh awlsam taka hriat theih a ni dawn a ni. Gas cylinder thar hi 10 kg composite cylinder (fiber glass) hmanga siam a ni a, tuiek (rust) ve lo tur leh kangmei chhuak thei lakah pawh him zawk tura beisei a ni.
Indane Xtralite NOW FTC Gas cylinder hi hmang tura in-register leh refill duhte tan IndianOil ONE App leh IndianOil website (https://cx.indianoil.in) atang te a tih theih tura ruahman niin, Whatsapp booking pawh tih theih tura hmalak mek a ni a. Vawi khat in-register man hi Rs. 4900 vel niin a refill man hi Rs. 1800 vel ni tura ruahman a ni a. Tun MIZO-FED leh Vanbuangi agency ten an pe chhuak ang.