Hna lak sut tura sawrkar thutlukna High Court in a pawmpui

Nikum (2025)-a Sericulture Demonstrator lak chungchanga Writ Petition chu Gauhati High Court chuan ngaihtuahin sawrkar thutlukna lo siam tawh angin he hna lak (recruitment) process pumpui leh appointment a lo pek tawh te chu tihtawp a ni.
Hemi chungchanga MZP General Hqrs. sawi danin Mizo Zirlai Pawl (MZP) General Hqrs. chuan Sericulture Demonstrator hna lak chungchangah hian Mizoram Direct Recruitment (Conduct of Examination) Guidelines, 2018 bawhchhiatna awm ngei niin an hria a, nikum May 13, 2025 khan sawrkar hnenah Inquiry Committee din turin sawrkar chu an ngen a. Sawrkarin Inquiry Committee a din hnuah Candidate 35 te kawmin, chung zinga mi 4 chuan Exam Hall-ah Mobile Phone an kenluh thu leh Exam Hall-a luh dawnah Candidate te chu Admit Card-a tarlan ken phalloh te an keng em tih enfiah mumal an ni lo tih hmuhchhuah a ni a. Inquiry Committee hian Paper-I leh Paper-II chu Exam that leh an rawt bawk a ni.

Sawrkar chuan Inquiry Report leh Law & Judicial Department Legal Advice angin he hnalak (recruitment) process zawng zawng hi a cancel a, candidate tling mi 4 te chu High Court-ah kalin, July 31, 2026 (Zirtawpni) khan Gauhati High Court chuan hemi chungchang ah hian thutlukna siamin sawrkar thutlukna chu a pawmpui a, Sericulture Demonstrator hna lak (recruitment) process zawng zawng leh appointment lo pek tawh chu a titawp ta a ni. MZP chuan Mizo zirlai leh thalai hna zawng mekte inkarah inelna thianghlim leh langtlang a awm theih nan hma a la chhunzawm zel dawn tih an sawi bawk.